Demasiado líder para tan curto Asmubal

Remou e remou, pero ao Inelsa Solar Asmubal Meaño non lle quedou outra que asumir na noite do pasado sábado a súa inferioridade fronte ao líder do Grupo A da División Honor Plata Femenina de balonmán, o Rocasa Gran Canaria B: 23-31. Un duelo que ben podería ter tido un destino moi diferente de dispoñer o equipo local do seu cadro de xogadoras ao completo, e non verse na tesitura de enfrontarse ao mellor conxunto da Liga coa súa primeira liña baixo mínimos, sen boa parte da súas xogadoras de referencia e cun só troco no banco.

A baixa por lesión de Laura Miniño privou o Asmubal da muller que podería ter obrigado a abrir a 6-0 do Rocasa B. Véndose seguro ante a ausencia de tiradoras exteriores nas filas rivais, o cadro canario viviu tranquilo todo o encontro fronte a un anfitrión que tampouco dispuxo da mancada Raquel Sineiro para ameazar co seu un contra un, nin da capacidade para abrir a cancha da brasileira Nicole, que leva un mes de retraso no seu regreso a España por un problema burocrático que debera encender xa as alarmas no club meañés. Nesta situación, o Asmubal pelexou ata que a dez do final (20-23) se lle esgotou a resistencia.