Recital mundial do Kenpo Vilagarcía

Botando un ollo á colleita acumulada polo Kenpo Vilagarcía desde a súa estrea no Campionato do Mundo, no ano 2017, semellaba difícil crer que os deportistas preparados por Mario Hermo puideran chegar inda máis aló. A semana pasada, na localidade portuguesa de Caldas da Rainha, demostraron que, co seu adestrador á fronte, non teñen límites. Os dez kenpocas arousáns con praza na selección española tras a superación do correspondente proceso interno volveron o domingo xunto co seu mestre, técnico das categorías absolutas e responsable do equipo de parakenpo, con 32 medallas mundiais, a metade en forma de títulos, algunhas compartidas formando parella ou equipo entre as variadas modalidades dos cadros de competición do kenpo. Con varios nomes propios. O primeiro, o de Pedro Muñoz Fole.

O único deportista do Kenpo Vilagarcía presente en cada edición desde a estrea do club no Mundial foi elixido mellor competidor absoluto na gran cita de Caldas da Rainha. Un premio extra no que se tivo en conta tanto a súa actuación no 19.º Campionato do Mundo como a súa traxectoria, rematando en cada un destes seis anos campión en a lo menos unha das modalidades individuais. Desta volta, na de semikenpo en -75 quilos, revalidando unha final convertida en clásico, fronte ao loitador profesional romanés Mirel Dragan. Pedro Muñoz impúxose no punto de ouro no combate máis longo do Mundial, de 6 minutos e 26 segundos. Fíxoo cun ombro lesionado desde o día anterior, cando se tivo que conformar co bronce en submissión ao terse que retirar polo problema físico na súa semifinal. Unha prata en kata sénior e en kobudo sénior e un bronce en kata por equipos sénior completan a folla de servizos de Fole.

Tamén con cinco medallas volveron de Portugal os seus compañeiros Ricardo Ramos Súarez (ouro en kobudo, en defensa persoal dúo masculino e en defensa persoal equipos mixto, prata en defensa persoal dúo mixto e bronce en kata por equipos sénior masculino) e Martín Pintos Gutiérrez (ouro en kata por equipos júnior e en defensa persoal cadete, prata en semikenpo júnior e en fullkenpo júnior -80 quilos e bronce en submission sub 21 en -75 quilos).

Estes foron os resultados do resto dos deportistas do K. Vilagarcía: Ricardo Lages Crespo, ouro en kata sénior e en defensa persoal equipos mixto e bronce en kata por equipos; Irene Castro Núñez, ouro en defensa persoal equipos mixto, prata en defensa persoal sénior mixta e bronce en semikenpo -65 quilos; Juan Rodríguez Alcalde, ouro en semikenpo júnior -90 quilos e en kata por equipos júnior e prata en defensa persoal júnior; Damián Murga Logroño, ouro en defensa persoal cadete e en kata por equipos júnior e bronce en semikenpo cadete en -60 quilos; Sócrates Agudo Torrado, ouro en fullkenpo sub 21 masculino e bronce en submission sénior en -90 quilos; Pablo Muñoz Fole, bronce en semikenpo sénior en -70 quilos; e como outro nome propio, o vilagarcián Pablo Muras Abad, coma Irene Castro, Pablo Muñoz, Martín Pintos e Damián Murga, novato nun Mundial, só que no seu caso na terceira edición do de Kenpo Adaptado/Parakenpo. Muras, primeiro deportista español cadete nesta cita, subliña Mario Hermo, colgouse o ouro en kata e o bronce en kobudo en 14-15 anos, dándolle ao seu mestre «la mayor alegría de este Mundial».