«Mareas do Coñecemento» programa en Poio catro seminarios sobre saúde e soidade no desexada
VIGO CIUDAD
Mareas de Coñecemento, o proxecto sobre saúde e soidade non desexada, regresa a Poio con catro seminarios destinados a maiores de 50 anos e impartidos por profesores da Universidade de Vigo. Acompañado por Fernando Cerdeira, director do Centro de Posgrado e Formación Permanente, e de Carmen María Abreu, coordinadora xeral do Programa de Maiores da Universidade de Vigo, o alcalde Ángel Moldes destacou que se trata dun «programa moi interesante para fomentar o envellecemento activo e dar reposta ás inquedanzas de todas esas persoas que queren seguir formándose e aprendendo da ciencia e da cultura independentemente da súa idade e, sobre todo, independentemente do lugar onde residan. Fóra das cidades, tendo a oportunidade de participar en iniciativas e propostas moi enriquecedoras».
Deste xeito, a primeira das sesións, Hábitos para unha mente saudable, desenvolverase o 20 de maio na Casa Rosada abordando «a relación entre os hábitos de vida e o coidado da saúde mental, destacando pequenas accións diarias e estratexias accesibles para manter a mente activa e equilibrada». Neste mesmo espazo impartiranse o 27 e 29 de maio impartirase A saúde é o que importa, mentres que o 16 de xuño programouse Coñecendo a fraxilidade e, xa o 20 deste mesmo mes, Soidade non desexada.
Os catro seminarios son independentes entre si. Mareas de Coñecemento é unha actividade gratuíta que se organiza en colaboración co Programa Universitario de Maiores da Universidade de Vigo e da Xunta de Galicia, de tal xeito que as persoas interesadas en participar xa se poden anotar no Pazo Besada ou no teléfono 986 872 401 ata completar as prazas dispoñibles.