A Universidade de Vigo e a Deputación presentan un ciclo de cinema ao redor da lingua galega
VIGO CIUDAD
As proxeccións terán lugar na sede do Parque Nacional das Illas Atlánticas de Galicia
01 abr 2024 . Actualizado a las 18:42 h.A Universidade de Vigo e a Deputación de Pontevedra poñen en marcha o ciclo A lingua galega no cine. A primeira parte do ciclo desenvólvese en abril e maio no auditorio do edificio Cambón (sede do Parque Nacional das Illas Atlánticas de Galicia). A actividade comprenderá unha serie de proxeccións e debates sobre a situación do sector audiovisual galego e o valor da lingua galega. O ciclo comezará mañá, martes 2 de abril ás 19.00 horas, coa proxección de Os espazos en branco, de Bruno Arias, que participará no acto.
Durante a presentación do ciclo, a vicepresidenta da Deputación, Luisa Sánchez, destacou a importancia do cinema na súa contribución ao desenvolvemento social e económico dun territorio, e destacou que «para iso precisamos amosar a nosa identidade propia, a nosa singularidade, o que é imposible de imitar porque é unicamente noso».
No ciclo, engadiu a vicepresidenta da Deputación, «o público vai poder gozar de grandísimas historias, dunha amalgama moi diversa de autores e de cintas, tanto longas como curtas, que amosan que o noso cinema, e en xeral todo o noso sector audiovisual, está a pasar polo seu mellor momento tanto de recoñecementos como de público, cuxo apoio é necesario para que a industria poida sobrevivir».
«Reivindicar o uso do galego que, aínda que está tendo unha importancia crecente no eido do cine, non somos de todo conscientes da súa potencialidade», sinalou, pola súa banda, a vicerreitora de Extensión Universitaria, Susana Reboreda, durante o acto de presentación do ciclo.
A segunda película poderase ver o 9 de abril. Será Pelerinaxes, de Simone Saibene. O 23 de abril proxectarase A illa das mentiras, de Paula Cons, e o 30 de abril, O soño da Sultana, de Isabel Herguera. O 2 de maio haberá unha mesa redonda en torno ao título A lingua animada en Galicia. E o 9 de maio proxectaranse as curtametraxes Xoves de comadres, de Noemí Chantada; Mentres iso pasa, de Nacho Ozores; Sandwich Cat, de David Fidalgo; A rabia, de Alberto Díaz; e Nena, de Xosé A. Touriñán.