Os xogos de materia e escala de Silverio Rivas

x. f. REDACCIÓN / LA VOZ

VIGO CIUDAD

En primeiro termo, a peza feita do bloque de mármore de Macael; detrás, «Barca solar» XOÁN CARLOS GIL

A Casa das Artes de Vigo repasa cunha trintena de obras a traxectoria do escultor

21 oct 2020 . Actualizado a las 05:00 h.

Tres obras de Silverio Rivas (Ponteareas, 1942) dan a benvida á súa exposición retrospectiva na Casa das Artes de Vigo: Fósil, de 1975, con máis de cinco metros de longo e realizada en resina de poliéster; Sen título, realizada entre 1990 e o 2015 a partir dun bloque de mármore branco de Macael e Ayous ou Barca solar, unha ensamblaxe de planos de madeira. Esta introdución á mostra Mente / Materia, producida polo Concello de Vigo e comisariada por Javier Pérez Buján, xa advirte de dous trazos característicos na traxectoria do escultor: o xogo coas escalas e cos materiais das pezas.

Segundo o comisario, Rivas decátase moi cedo de que «o sentido da escultura está en si mesma». «Descobre que é o propio material o que vai ditando o camiño e que soamente dende un profundo coñecemento do mesmo é posible chegar a resultados satisfactorios». Deste xeito, conviven na exposición obras feitas a partir de mármore e madeira, aceiro inoxidable e bronce, resina de poliéster e fibra de vidro, e un granito que descobre durante a súa estadía en París e Normandía, e que ao seu regreso a Galicia traballará con gran protagonismo.

A rotundidade e a lixeireza

Esta diversidade de materiais correspóndese tamén con ese xogo de escalas e tamaños, ademais de coa percepción que o espectador obtén de cada peza, que pode pasar da rotundidade granítica de obras como Espazo para o Apóstolo ou Ondulado en cruz á lixeireza da instalación inédita Iridiscencias ramosas, do 2018, cunhas ramas policromadas que penduran do teito. Esta aposta polo cambio e a experimentación fai que sexa difícil falar de «estilo» na produción de Rivas, segundo Pérez Buján: «A pesar de que as súas obras son facilmente recoñecibles, poderiamos dicir que o artista propón solucións expresivas concretas, conforme as necesidades de cada material, nun cambio continuo co que, con todo, busca a idea de permanencia».

O diálogo entre linguaxes, formas e materiais distintas é transversal nas pezas de Mente / Materia, que se pode visitar ata o vindeiro día 31. «As relacións entre masa, volume, peso, baleiro, equilibrio e dinamismo son as cuestións centrais do seu traballo», describe o comisario sobre a obra de Silverio Rivas. «Con elas desenvolve unha linguaxe tan solvente coma persoal que ten evolucionado en dúas direccións: a utilización dunha maior variedade de materiais e a simplificación do seu vocabulario, que pouco a pouco se foi ceibando de redundancias, hipérboles e metáforas, ata quedar co esencial».