Xosé Luis Franco Grande presenta o poemario «Libro das abandonadas»

Ás 20.30 horas, na sala de conferencias da sede Afundación (Policarpo Sanz 26), comezará o acto de presentación do novo título de Teófilo Edicións Libro das abandonadas, de Xosé Luis Franco Grande, membro da Real Academia Galega e Premio Nacional de Literatura. O autor estará acompañado por Xesús Alonso Montero, presidente da RAG, e polo editor, José Luis Teófilo Piñeiro.

O libro abordo tres tipos de mulleres abandonadas. «Unha é moi típica de Galicia; son as que Rosalía chamou viúvas de vivos. Eran aquelas mulleres que quedan ao fronte da familia cando o seu home emigra; é un drama moi coñecido en Galicia», explica o autor.

O segundo grupo de mulleres abandonadas que inclúe Franco Grande son as mulleres abandonadas polo seu amante, «é un tema que foi moi tratado por poetas como Rilke, ou os casos típicos da monxa portuguesa Mariana Alcofarado».

As outras abandonadas que trata no libro Xosé Luis Francos Grande son as que nacen en orfandade, aquelas nenas das que se descoñece a súa orixe. A cada un destes tipos de abandonos se lles dedica unha parte do libro.

«Estou moi contento porque máis que un libro parece unha xoia, está moi ben editado. Ademais o prezo é razoable porque custa vinte euros, o que custa calquera libro pero este é unha xoia», di o autor nado en Tomiño e residente en Vigo.

Este é o libro de poemas máis rápido feito por Franco Grande, quen adoita en tomarse o seu tempo nas labores de depuración da poesía. Nesta ocasión, dun xeito que mesmo lle sorprendeu a el mesmo, o libro sae tan só un ano despois da publicación de Xoguetes do tempo, un poemario no que reflexionaba o autor sobre o paso do tempo.