Falece Olga Gallego, ex directora do Arquivo Histórico de Ourense e membro da Real Academia Galega


ourense/la voz.

Olga Gallego Domínguez, directora do Arquivo Histórico Provincial de Ourense ata a súa xubilación e membro da Real Academia de la Historia e da Real Academia Galega, finou onte en Ourense. Nacida en decembro de 1923 na cidade ourensá, estaba a piques de cumprir os 87 anos. Olga Gallego era licenciada en Filosofía e Letras e foi directora do Arquivo da Delegación de Facenda en Vigo, a finais dos anos 50 do pasado século, e bibliotecaria da Fundación Penzol.

Amais foi a responsable do Arquivo Histórico Provincial de Ourense e da Delegación de Facenda na mesma cidade. Desenvolveu durante toda a súa vida profesional unha ampla e prolífica actividade como investigadora, froito da cal naceron títulos sobre o propio Arquivo Histórico Provincial de Ourense, o do mosteiro de Celanova, as barcas e os barcos de pasaxe da provincia durante o antigo réxime ou unha visión da cidade ao través dos séculos.

Investigar ata o final

Olga Gallego desenvolveu ata o final unha disciplina e unha importante labor como investigadora. Membro do grupo Marcelo Macías, acudía todas as mañás ao Arquivo Histórico Provincial de Ourense, para consultar os seus fondos e tomar notas, sobre as que logo seguía traballando, polas tardes, na súa casa da Praza Maior de Ourense.

O seu último traballo publicado foi o referido aos condes de Ribadavia e segundo recoñecía Xulio Rodríguez, do Museo Arqueolóxico de Ourense, viña de rematar un estudio sobre a idade moderna na Limia para unha publicación do Grupo Marcelo Macías e a Fundación Barrié sobre A Limia. Unha das súas últimas comparecencias públicas foi con motivo dunha xornada organizada polo Concello de Ourense, na que se analizaba a historia da cidade de As Burgas.

O enterro será hoxe, ás 16.30 horas, no cemiterio de San Francisco.

Conoce nuestra newsletter con toda la actualidad de Vigo

Hemos creado para ti una selección de noticias de la ciudad y su área metropolitana para que las recibas en tu correo electrónico. Descubre nuestro nuevo servicio.

Votación
7 votos

Falece Olga Gallego, ex directora do Arquivo Histórico de Ourense e membro da Real Academia Galega