José Moure González rexenta na parroquia chantadina de Viana un negocio de receba de porcos e de venda de derivados deste animal, principalmente xamóns e embutidos. Segundo afirma, os produtos que obtén son «100% caseiros» grazas á alimentación que proporciona aos animais e ao uso dos métodos tradicionais de salgadura.
-¿Ten algunha receita especial para cebar os porcos?
-O sistema que utilizo consiste en alimentalos cun penso a base de millo, cebada e soia, ademais de landras e castañas. Preparo os pensos cada tres meses e de cada vez elaboro un cargamento de 6.500 quilos, dos que 4.000 son de millo, 2.000 de cebada e o resto de soia. A matanza faise no matadoiro por cuestións legais e sanitarias, pero eu encárgome despois de despezar os porcos e de todo o demais.
-¿Ten tamén porco celta na súa oferta?
-Si, dedícome tamén a cebar e vender porco celta, que ao meu entender é o mellor que hai para preparar os botelos. Estes porcos mátanse un pouco máis tarde que os outros, ou sexa, dentro dun par de semanas.
-¿Os seus produtos teñen moita demanda durante o Nadal?
-Moita, tanto que antes de comezar as festas normalmente xa teño vendidas todas as existencias para estes días. Ademais, nesta época produzo máis cantidade para atender á demanda de restaurantes de Vigo e de Madrid.