O acto, que se desenvolverá o venres, xirará en torno ao libro «Un intre no tempo»
23 abr 2026 . Actualizado a las 01:37 h.Co gallo da celebración do Día do Libro, o Concello de Tomiño rende homenaxe a un dos seus fillos máis ilustres, o intelectual galeguista Xosé Luís Franco Grande (Tebra, 1936 - Vigo, 2020). O venres, ás 20:00 horas no Espazo Isaura Gómez, presentarase o libro Un intre no tempo. Poesía reunida (1967-2017), unha viaxe polos catro poemarios do intelectual, declarado fillo predilecto da súa terra en 2012.
Segundo indican dende o Concello de Tomiño, o encontro quere lembrar a figura do autor e, ademais, reivindicar o seu legado esencial na historia cultural e lingüística de Galicia. Lembran que Franco Grande foi moito máis ca un escritor: foi poeta, avogado, membro de número da Real Academia Galega e autor do primeiro dicionario galego-castelán moderno, unha obra fundamental que abriu camiño para que xeracións enteiras puidesen aprender e vivir en lingua galega.
A alcaldesa de Tomiño, Sandra González, quixo destacar a importancia de render esta homenaxe a Franco Grande, quen «escribiu moito máis que libros: debuxou camiños para todo un pobo e axudounos a entender quen somos e de onde vimos». A rexedora convidou a toda a veciñanza a participar neste emotivo acto, «un encontro para sentir, para deixar que as súas palabras nos atravesen e nos acompañen. Porque cando celebramos a figuras como Franco Grande, non só honramos a súa memoria, senón que mantemos viva a súa voz no presente».
O libro Un intre no tempo. Poesía reunida (1967-2017) é un volume publicado por Galaxia que reúne os catro poemarios que o académico de número publicou en vida, nunha edición preparada pola filóloga Teresa Seara.