Morre Severino Novas, o rondalleiro e «peixeiro-gaiteiro» do festival de Cans
VIGO
Era moi querido no Porriño, onde dirixía a rondalla de Santa María, e en Cangas, concello do que foi concelleiro de Deportes
22 feb 2026 . Actualizado a las 01:26 h.Cangas e O Porriño despiden este venres a Severino Novas (Cangas, 1973), un veciño que coa súa música, as súas ganas de traballar e a súa boa man na cociña deixou unha fonda pegada en moitas persoas. «A morte dun gaiteiro produce silencio. Cando morre un gaiteiro e se apaga unha gaita, Galicia perde un anaco da súa alegría. Deixounos Seve, o peixeiro-gaiteiro do Morrazo, que un día veu botar raíces a O Porriño», conta o director do festival de Cans, Alfonso Pato. El era de Cangas, pero na Louriña seguiu debuxando a súa vida coa música.
Novas era unha institución no mundo rondalleiro, a súa imaxe foi portada de La Voz de Galicia en 2022 durante unha actuación na estación marítima de Vigo. Foi director da rondalla de Vincios e da de Santa María do Porriño, que este venres tamén se despide del: «Día triste para todos os compoñentes. Hoxe o capitán deste barco deixounos e con el queda un baleiro en todos nós. Alá onde esteas a túa música perdurará en nós. Somos unha familia. Somos un equipo». Este venres moitas outras rondallas tamén aproveitaron para despedirse de Seve.
«Sempre sacaba enerxía e un sorriso para tocar e animar a todos os que estaban ao seu redor. Imos botalo moito en falta», di Paula, a súa amiga e compañeira na directiva da rondalla Santa María. Ela tiña o talento, enerxía, forza e humanidade de Seve coma exemplo. A vida do rondalleiro é unha partitura que se comezou a compoñer en Cangas. «Xa de moi novo tivo que traballar para un hotel no paseo do municipio», continúa a súa amiga, que describe ao rondalleiro coma un home que «sempre lle botou peito a todo».
A música foi un dos grandes amores de Seve. Comezou formándose en música clásica, pero a vida levouno á gaita, á música tradicional e a un dos seu grandes amores: as rondallas. Era unha das figuras máis coñecidas deste fenómeno cultural do sur de Galicia. Foi director da rondalla de Vincios varios anos, pero el tiña a ilusión de montar unha propia no centro do Porriño, onde traballaba cada día na súa peixaría. Custou, pero a rondalla de Santa María tocou as súas primeiras notas en 2024. Era a súa paixón e, aínda que loitaba contra un cancro, «nunca quixo deixar atrás un concerto ou que a rondalla faltara a algunha cita. Quería alegrar aos veciños percorrendo todos os barrios».
«Seve nunca paraba. Era un home que facía varias cousas a vez e nin a enfermidade podía facer que quedara quieto», continúa Paula, que explica que «a súa oncóloga dicía que non coñecía a un paciente coma el. Sorprendía a súa capacidade de tirar para adiante malia todo».
Desde as primeiras edicións do evento do festival de Cangas estaba aí para todo. Facía paellas e cociñaba para os convidados, logo servía navallas no seu mítico posto no Cans Voulevas e, recentemente, ofrecía os seus manxares na Leira do Río. Ademais, como lembran no festival, a súa cociña sempre se marinaba coa música da súa gaita.
Seve «facía o xoves o pasarrúas cos chimpíns no Porriño cos Zoqueiros e o sábado coa banda de gaitas de San Xurxo de Mosende, despois de atender pola mañá o seu posto de peixe na praza», continúan. «Ao longo de moitos anos, Seve fíxonos paellas para todos en Cans, tróuxonos navallas e facía foliadas ao mesmo tempo. Seve era unha parte da paisaxe humana do Festival de Cans, e tamén da aldea, a onde lle traía peixe a moita xente ao longo do ano», engade Alfonso Pato.
O rondalleiro tamén foi unha persoa de relevancia na política de Cangas dos anos 90 e principios dos 2000. O 22 de decembro de 1996 substituíu a Lao Sotelo como concelleiro do BNG e foi o edil encargado da área de Deportes. Alí estivo varios anos, onde tamén se converteu nunha figura moi querida no municipio de O Morrazo.
A despedida de Seve será no tanatorio Louriña Memoria hoxe pola tarde e mañá. As 17.30 horas será o funeral na igrexa de Santa María e logo as rondallas de O Porriño despedirán ao seu rondalleiro no cemiterio municipal.