«Ser quen de repetir podio catro veces foi un resultado inesperado»

O tomiñés é o palexeiro con máis medallas no torneo, catro das 23 acadadas pola federación española


Vigo

Roi Rodríguez (Vigo, 1994) é o palexeiro que máis medallas acadou ata o momento en copas do mundo para o piragüismo español: catro (un prata en tres bronces en K-1 500 e K-1 1000 metros) de 23. O tomiñés, localidade na que reside, achácao a que ten máis tempo para adestrar e que agora pode adicarse ao seu deporte ao 100 %. O reto ao longo prazo son os Xogos, pero este verán quere estar no Mundial absoluto. De entrada no K-1.

-¿Como sentan catro medallas en nove días en dúas citas internacionais?

-Foron datas un pouco estresantes pero a verdade é que estou moi ledo e o resultado que obtiven nas dúas copas do mundo, que eran probas que tiñan un moi alto nivel xa que estaban os mellores piraguistas a nivel mundial, e ser capaz de repetir podio nas catro probas foi un resultado inesperado pero deixome moi contento.

-Non contaba con catro podios...

-Sabía que estaba forte, pero non o esperaba. No 500 teño un pouco máis de experiencia, pero en 1.000 metros era a primeira vez que era capaz de estar nunha final de eses niveis, entón meterme na final e facer podio foi un resultado altamente positivo.

-¿Mellor no 500 ou no 1000?

-Estou baseando a miña preparación nos 1.000 metros porque é a distancia olímpica, pero deféndome de forma similar nas dúas.

-¿Dos catro metais cal foi o máis complicado?

-Complicadas igual foron todas, na distancia de 1.000 metros foi o máis difícil tanto en Hungría coma en Serbia.

-¿Está en mellor pico de forma que en tempadas anteriores?

-Este ano estou adestrando moito. Case rematei a miña carreira, que me quitaba un tempo co que non podía estar na casa sempre, e este ano estou na casa sempre e creo que estou un pouco por riba destes últimos tres anos.

-¿Adícase ao piragüismo dun xeito profesional?

-Este ano si, teño a sorte de ter unha beca de Telefónica que me permite poder adicarme ao 100 % ao piraguismo. A beca téñoa dende os resultados do 2015 cando fun capaz de quedar campión do mundo sub-23 en K-1 e K-4 e a verdade é unha recompensa que me permite adicarme ano 100 % ao piraguismo.

-¿O obxectivo son os Xogos?

-A longo prazo si, pero o obxectivo desta tempada é o mundial absoluto que é a finais de agosto e para o que teremos un selectivo unhas semanas antes.

-No Europeo Marcus Cooper cortoulle o camiño.

-Tivemos un selectivo que me gañou el e irá el no K-1 pero igual vou eu en K-1 500. Estou á espera de que me confirmen a praza.

-¿Cambios na preparación?

-O único é que agora teño moito máis tempo, antes só podía facer unha sesión e agora estou adestrando dúas moitos días, mañá e tarde. Á semana adícolle unhas 30 horas. Habitualmente si, salvo algunha concentración que fixen en Sevilla, Madrid e Asturias con Esteban Alonso e Manuel Pedrares, que tamén axuda.

-¿Como ve a su evolución dentro desta disciplina deportiva?

-Cando gañei o Europeo no 2014, foi a primeira vez que competin fóra e non sabía cal era o meu nivel respecto aos contrincantes e fun capaz de facerme co primeiro posto, foi aí onde empecei a medrar e agora sigo pasiño a pasiño para poder meterme na categoría absoluta, algo que parece que estou conseguindo.

-¿Vese ao nivel dos top do piragüismo español?

-No piragüismo español sí, pero o complicado é manterse e loitar a nivel internacional.

-¿Ve algunha posibilidade de meterse nun K-4 cheo de miuras?

-O barco está en proceso de selección, pero está complicado meterse. Hai disputa e eu estou un pouco no medio. De momento adícome ó K-1 e se me queren, perfecto.

-Máis tranquilo no K-1...

-Estou centrado neste barco. A antaxe é que dependes de ti mesmo, pero a desvantaxe é que te xogas todo a unha proba e se perdes a proba...

-¿Cales son as vindeiras citas do seu calendario?

-En principio o Europeo absoluto é a seguinte proba na que participarei. Sería no K-1 500 ou no K-2 500 con Rubén Millán. Tamén teño o mundial sub -23 pero non sei se participarei porque me coincide moi xunto co selectivo do mundial absoluto. É o que teño que decidir.

-¿Como se lle dá o K-2?

-É unha proba que non estiven traballando moito porque non tiña tempo de adestrar cunha parella. Penso que é unha proba que se me vai a dar ben, pero non tiven oportunidade de traballala.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

«Ser quen de repetir podio catro veces foi un resultado inesperado»