O terceiro satélite vigués vai á Estación Internaciona

O «Serpens» viaxará á EEI abordo dunha nave xaponesa, e unha vez no laboratorio orbital un robot o despregará


Vigo / La Voz

A Agrupación Aeroespacial da Universidade de Vigo conta os días para que o nanosatélite Serpens orbite dende a Estación Espacial Internacional, o próximo 16 de agosto. Este será o terceiro que lancen, tralo Xatcobeo e o Humsat, nos anos 2012 e 2013 respectivamente.

O proxecto Serpens, impulsado dende a Agencia Espacial Basileira, é «a consolidación da internacionalización das nosas actividades», explicou Fernando Aguado, coordinador da Agrupación Aeroespacial. Este satélite conta con catro estacións en terra e unha vintena de sensores que enviarán datos ambientais a través de frecuencias de radio.

Os enxeñeiros Diego Nodar, Alberto González e Antón Vázquez, partícipes do proxecto en Vigo, viaxaron ata Brasil para a integración e test do satélite na última fase do proxecto hai dous anos, e cualificaron a experiencia de «moi positiva», pois «non tiveramos a oportunidade de traballar con outros equipos de xeito continuado», o que lles permitiu «ver outras formas de traballar e mellorar, por suposto», explica Diego Nodar. Ademais, Fernando Aguado lembra que grazas o «éxito acadado cos anteriores satélites», a profesora Chantal Cappelletti da Universidade de Brasilia «contratounos como grupo recoñecido para darlle soporte tecnolóxico ao proxecto». O Serpens está dividido en dous sectores, desenrolado o segundo deles pola Universidade de Vigo, e que inclúe unha plataforma de altas prestacións e unha carga útil evolucionada do Humsat, «que inclúe melloras baseadas nos datos en órbita do satélite», detallou Aguado. A participación da agrupación será fundamental tamén durante a operación de despregue de sensores durante a fase de lanzamento.

Fase final

Este proceso levarase a cabo o 16 de agosto en Tsukuba, Xapón, momento no que se producirá a integración final no lanzador e estará listo para ser enviado á Estación Espacial Internacional (EEI). Nese momento, serán os propios astronautas alí aloxados quen poñan na órbita final o Sepens «coa axuda dun brazo robótico», explicou Alberto González, partícipe vigués do proxecto. As antenas do satélite despregaranse entón e se recibirán os primeiros datos de comprobación, para comezar o seu traballo unhas dúas semanas despois. Ademais de Vigo e a Agencia do Brasil, participou tamén California con dous centros e Roma, coa colaboración da Sapienza Universitá.

Antón Vázquez considerou as auditorías de seguridade da Axencia Espacial Xaponesa como o momento máis delicado do proxecto ata a data. «Afortunadamente non tivemos problemas e obtivemos a autorización para lo lanzamento», lembra. Os membros do proxecto coincidiron no indispensable dunha boa «coordinación e traballo conxunto » entre os centros «para minimizar os riscos globais». Mentres tanto, a Universidade de Vigo prosigue co desenvolvemento de satélite Femtoxat.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
5 votos
Comentarios

O terceiro satélite vigués vai á Estación Internaciona