Un profesor vigués estuda a iconografía de Rosalía de Castro

Publica en Xerais máis de 150 imaxes da maior icona da cultura galega


vigo / la voz

Rosalía de Castro. Imaxe e realidade é o título do libro de Fernando Pereira Bueno, publicado en Edicións Xerais, no que se fai o primeiro estudo iconográfico da escritora galega. «Ela é unha figura mitificada e a súa imaxe contribuíu a esa popularidade e visibilidade que ten hoxe en día», explica o autor, que é profesor de Ciencias Sociais no IES Carlos Casares de Vigo.

Fernando Pereira analiza algunhas das interpretacións que da imaxe e do espírito da poeta fixeron os artistas plásticos de distintas épocas. Ao longo de tres anos, o autor rastrexou documentación ao respecto en hemerotecas, arquivos e bibliotecas, para seleccionar ao redor de 150 imaxes para o libro. «Atopei máis pero fixen unha selección na que non sempre guieime pola calidade artística; as veces, a singularidade ou a rareza foi a razón para elixir unha ilustración; por exemplo, hai un cómic de 1976 para nenos», explica o autor.

Un debuxo do ilustrador galego Federico Ribas, do ano 1939, é a peza máis curiosa para o autor do libro. Foi feita en Arxentina para anunciar unha homenaxe á autora de Cantares Gallegos.

Ao longo do tempo a visión de Rosalía de Castro mudou dende aquela muller melancólica e triste á actualidade. «Os deseñadores dos anos oitenta fixeron o cambio que permitiu que a xuventude achégase agora a súa icona», sinala o investigador.

Fernando Pereira pregúntase no seu libro se a imaxe de Rosalía correspóndese coa súa verdadeira personalidade. «Eu creo que non» contéstase. «É normal nos personaxes que acadan un gran valor simbólico, porque ela supera o plano literario para converterse nun símbolo nacional, unha marca galega», engade.

Modesto Brocos

Entre caricaturas, fotografías, retratos, selos, billetes e outros soportes, Fernando Pereira elixe o cadro pintado por Modesto Brocos para sinalar a maior proximidade entre realidade e imaxe. «É a representación realista máis próxima ao que debeu de ser Rosalía», di o autor do estudo.

Pereira afirma que a escritora está hoxe en día nos mercados, «é unha marca máis».

Conoce nuestra newsletter con toda la actualidad de Vigo

Hemos creado para ti una selección de noticias de la ciudad y su área metropolitana para que las recibas en tu correo electrónico. Descubre nuestro nuevo servicio.

Votación
5 votos

Un profesor vigués estuda a iconografía de Rosalía de Castro