«Atrápame se podes» celebra o Nadal cun especial familiar cheo de famosos, nenos e solidariedade
TELEVISIÓN
Dez caras coñecidas do audiovisual competirán por parellas en dous programas, que recadarán fondos para organizacións sen ánimo de lucro
08 ene 2026 . Actualizado a las 13:30 h.A estrea de Rodrigo Vázquez como presentador de Atrápame se podes terá lugar cun especial de Nadal concibido para gozar en familia. Este primeiro bloque ten unha duración de tres semanas: nas dúas primeiras participarán vinte caras coñecidas do audiovisual galego en parellas, mentres que na terceira semana serán os nenos e nenas os verdadeiros protagonistas.
Os concursantes da primeira semana de especial son: Aitana del Mar e Laura Boado, que conforman a parella A Canteira; Miguel Mandayo e Octavio Villazala, nomeados como Os Animais Virais; Fran Nogueira e Fran Cañotas, que forman os Frankies; o dúo dos Actores, composto por Xoán Fórneas e Elena Seijo; e Os Informantes, os xornalistas Bernardo Montaña e Rocío Durán.
O formato manterá os seus sinais de identidade, xa recoñecibles para os seus seguidores. Os participantes deberán superar cinco roldas eliminatorias nas que poñerán a proba a súa axilidade mental, os seus coñecementos e a capacidade de decisión baixo presión. Ademais, manterá un marcado compoñente social, xa que o diñeiro recadado nas edicións con famosos destinarase cada día a unha ONG distinta, reforzando o seu compromiso coa solidariedade. Federación Galega de Bancos de Alimentos (FEGABAL), Federación Galega de Dano Cerebral, Down Galicia, Stop Accidentes y Asociación de Axuda a Nenos Oncolóxicos de Galicia son as asociacións beneficiarias da primeira semana de especial de Nadal.
Unha vez rematadas as festas do Nadal, o concurso continuará en emisión coa súa edición normal. Voz Audiovisual, produtora responsable desta nova etapa, xa abriu un proceso de selección para escoller futuros concursantes, convidando a participar a todas aquelas persoas que queiran probar sorte. Con este regreso, Atrápame se podes consolídase como unha das apostas da TVG para o entretemento diario.