María Mera: «"Matalobos" tivo éxito porque é unha serie moi arriscada»

A intérprete destaca a evolución do seu personaxe tras cinco temporadas


Redacción / La Voz

A serie de Voz Audiovisual Matalobos leva cinco temporadas en TVG como favorita dos galegos e María Mera é unha das actrices que ten evolucionado de forma paralela ao seu personaxe, Vanesa Viaño.

-Hai tres anos moitos referíanse a María Mera como a gran promesa do audiovisual galego. ¿Imaxinaba que chegaría onde está agora?

-A verdade é que cando empecei non me imaxinaba poder vivir disto. Agora miro para atrás e vexo que Matalobos foi para min unha gran escola, hai unha evolución moi evidente tanto en min como no personaxe. Cando vexo a primeira temporada non me recoñezo, aprendín cousas novas en cada unha das etapas.

-O seu personaxe (Vanesa Viaño) é probablemente o que máis evolucionou ao longo das cinco temporadas de «Matalobos». ¿Cómo describe esa evolución?

-En primeiro lugar, Vanesa tivo un cambio de idade. Ao principio era unha adolescente rebelde que cae na droga, está nunha idade e nun momento complicados da súa vida. Pero logo ten un cambio radical e vólvese, digamos, máis boa. Pero segue querendo o diñeiro fácil. Despois xa aparece como unha muller casada, cunha forma de ser distinta. O cambio nótase ata na súa aparencia persoal: ao principio vai con vaqueiros e coleta, mentres que agora vístese de punta en branco.

-A serie fixo de trampolín na súa carreira, pero ademais segue aí tras cinco temporadas.

-Desde a primeira temporada pensamos que sería tamén a última, pero á xente gustoulle e repetimos. O difícil é volver empezar unha historia despois de que mataron a tanta xente [risos]. Pero oxalá que este tampouco sexa o fin, persoalmente gustaríame que continuase.

-¿Cal cre que é o gancho da serie? ¿Por qué tivo tanto éxito?

-Creo que tivo éxito porque é unha serie moi arriscada para o público galego. Había dúas opcións: ou era rotundamente aceptado, ou non. E foi o primeiro. A temática é moi distinta ao que se viu antes, e ademais nun só capítulo pasan moitas cousas, ten un ritmo trepidante e moita intriga e iso gustou ao público. E ademais o equipo da serie está moi compenetrado e iso nótase no resultado final.

-Naceu como actriz na serie. ¿Que quere para o futuro?

-Entrar en Matalobos foi un agasallo para min, porque antes fixen moitos castings nos que a resposta foi non. Abriume moitas portas para outras cousas e deume a coñecer. A partir de aí saíronme outros programa. Para o futuro querería seguir vivindo disto, aínda que non será fácil porque na conxuntura actual a industria está un pouco parada.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
14 votos

María Mera: «"Matalobos" tivo éxito porque é unha serie moi arriscada»