O Festival de Cine Independente de Ourense anunciarase cun cartel de Eduardo Rubianes
TELEVISIÓN
O Festival de Cine Independente de Ourense, que se celebrará entre os días 4 e 11 de novembro, xa deu a coñecer algúns aspectos da vindeira edición. Un deles, dos máis visibles, xa que se trata do cartel anunciador. O festival convocou un concurso ao que se presentaron corenta traballos e que premiou un orixinal de Eduardo Rubianes Naya. Recibirá 600 euros. Ademais, xa está aberto o prazo para remitir películas para a súa exhibición no festival; poden enviarse ata o vindeiro 31 de xullo. Nas tres primeiras semanas, os organizadores xa recibiron 29 curtametraxes, 11 documentais e cinco longametraxes, de países tan distantes como Nova Zelandia, Arxentina ou Tailandia, ademais de Portugal, Francia, Reino Unido ou Holanda. Premios O certame repartirá un total de 45.500 euros en premios, onde destaca o Gran Premio Calpurnia á mellor longametraxe, dotado con 20.000 euros. Ademais, esta cita co cine en Ourense ten previsto homenaxear ao actor Juan Diego, dentro da súa sección Memoria histórica. O motivo é a celebración do seu corenta aniversario como actor, xa que debutou en 1966 no filme Fantasía. A homenaxe engade un libro sobre a súa figura, coordinado por José Luis Castro de Paz e Julio Pérez Perucha. Outra actividade paralela será un ciclo dedicado ao director Luchino Visconti, de quen xustamente en novembro se celebra o centenario do seu nacemento.