A autora será nomeada filla adoptiva de Cotobade, o concello de orixe da súa familia O Museo de Unión Fenosa programou unha tertulia coa creadora de «A república dos soños».
26 mar 2005 . Actualizado a las 06:00 h.A escritora brasileira Nélida Piñón (Rio de Janeiro, 1937) sempre fixo gala das súas orixes galegas -os pais emigraron e se embarcaron nunha longa travesía atlántica-, unhas raíces que ademais desempeñaron un importante papel na súa conformación literaria. Así que Galicia sempre lle devolveu o galano. Agora, Piñón viaxa de novo á terra dos seus devanceiros, cunha apretada axenda que inclúe homenaxes, presentacións de libros e tertulias. «É galega polos catro costados» é unha das frases que con maior frecuencia se asocian á autora brasileira. A súa familia é natural do concello pontevedrés de Cotobade. Alí estará Nélida Piñón os días 1 e 2 de abril para participar nunha homenaxe duns veciños que a consideran unha paisana máis. Recibirá o título de filla adoptiva de Cotobade e presentará a edición en galego de A república dos soños , publicada orixinariamente en 1984 e considerada unha das súas obras máis importantes. O día 1 celebrarase un acto en colaboración coa Asociación Medioambiental e Cultura Cañón de Pau, que contará coa presencia da escritora Susana Fortes. O acto institucional está previsto para a seguinte xornada, ao mediodía, no edificio do Concello. Tertulia Pero non será a única oportunidade de escoitar a Nélida Piñón nesta viaxe. O día 31 protagonizará unha das xornadas do ciclo A arte da conversa (tertulias con...) que se celebra no Museo de Arte Contemporáneo Unión Fenosa, na Coruña. Nesta ocasión, Piñón terá como compañeiro de conversa precisamente ao editor en galego de A república dos soños, Víctor F. Freixanes, director da editorial Galaxia. Tamén escritor e xornalista, Freixanes presentará á autora e guiará a tertulia na que os asistentes poderán falar con Piñón. A entrada é libre.