A pesca artesanal só recibe o 4 % das cotas da UE porque aínda se reparten polas capturas históricas
PESCA Y MARISQUEO
Representa o 77 % da frota e o 49 do emprego, constata un informe da Eurocámara, que aprobou un orzamento de 1.016 millóns de euros para o sector no 2027
02 sep 2026 . Actualizado a las 04:55 h.En doce anos de política pesqueira común (PPC), ningún Estado membro foi castigado polo seu reparto de cotas malia que moitos deles non cumpran coa lei. Esta é unha —a máis destacada— das conclusións do informe do Parlamento Europeo sobre os criterios de asignación dos cupos, presentado nunha comisión de Pesca que tamén aprobou, este martes, o orzamento no sector para o vindeiro 2027, máis dun 2 % superior ao deste ano.
O informe sobre a distribución das oportunidades pesqueiras analiza máis de 200 criterios empregados polos Estados para xestionar cadansúas cotas. Malia que o artigo 17 do regulamento da PPC obrigue a empregar criterios medioambientais, económicos e sociais, estes só supoñen un cuarto do total; a grande maioría séguese repartindo polo histórico de capturas, que engloban o 67 % e é empregado por 21 dos 22 países costeiros da UE. A pesca artesanal só recibe o 4 % das cotas, malia que representan o 77 % dos buques e supoñan o 49 % da man de obra do sector. O estudo tamén denuncia que as cotas quitan a atención a outros aspectos de relevancia, como os días de faena, as licencias ou os límites de capacidade.
Malia non cumprir coa lei europea, a Comisión non ten declarado formalmente ningún sistema como ilegal, o que, sumado ao pouco cambio no reparto de cotas dende a entrada en doce anos, cuestiona a fortaleza da norma. É máis, tres dos 22 países costeiros —Bélxica, Eslovenia e o Países Baixos— non empregan ningún criterio ambiental, social ou económico. Bélxica asigna as súas cotas por capacidade de captura e os Países Baixos por concesións transferibles. Eslovenia emprega o acceso igualitario como criterio, xa que a capacidade da súa frota é inferior á súa asignación por Bruxelas.
1.016 millóns para o sector
O eurodeputado popular galego, Francisco Millán Mon, eloxiou o informe e amosou o seu acordo con conclusións como mellorar as boas prácticas ou fomentar o intercambio delas. «A política pesqueira da Unión debe dar importancia á pesca artesanal e de baixura. Como eurodeputado galego, son consciente da súa importancia», explicou.
A Comisión de Pesca tamén dou o visto bo ás contas europeas para o vindeiro ano 2027, o último do actual Marco Financeiro Plurianual. Os Estados terán á súa disposición case 733 millóns de euros do Fondo Europeo Marítimo, de Pesca e Acuicultura, un 1,57 % máis que no 2026. Sumando os acordos de pesca sostible en terceiros países, as organizacións rexionais de xestión ou a Axencia Europea de Control da Pesca, o total para o sector será de 1.016 millóns de euros, un 2,1 % máis que neste 2026. España é o Estado con máis cartos á súa disposición con 154,61 millóns, o 21,1% do total.