Permite percorrer a lonxa e ver o helicóptero de rescate Pesca 2
17 abr 2021 . Actualizado a las 08:58 h.A Confraría de Celeiro, en Viveiro, ten claro que debe contar aos rapaces a vida do sector, tan importante neste porto e na costa mariñá. Dende hai anos ten un programa específico para chegar aos colexios, Mariñeiros por un Día, no que os rapaces visitan as instalacións e ata a xoia do servizo, o helicóptero de rescate Pesca II. Pero a pandemia imposibilita as visitas dos nenos, e para que non esquezan a importancia do mar e a súa riqueza, dende Celeiro decidiron levar a confraría ás aulas a golpe de clic.
A web Mariñeiros por un día, o mar nun clic é unha adaptación á nova normalidade das visitas presenciais, un percorrido vía streaming da lonxa, o heliporto de Celeiro e o taller do Pescador. A rolda segue o modelo das visitas que xa fixeron 5.000 escolares de 130 colexios nos últimos cinco anos. Cambia a forma de facelo, pero non o obxectivo: «Dar a coñecer entre os escolares o sector pesqueiro, da man dos seus profesionais, e difundir o patrimonio e a cultura mariñeira», segundo explican na propia páxina da confraría.
O proxecto, que inclúe unhas unidades didácticas para traballar na clase, está pensado para rapaces dende quinto de primaria ata segundo de ESO. A inscrición realízaa o propio colexio poñéndose en contacto coa Confraría de Celeiro no correo reservas@mariñeirosporundia.com.
O programa está aberto a colexios e institutos de toda a provincia de Lugo, e está pensado especialmente para os rapaces que viven nos concellos do interior, xa que moitos deles non coñecen de preto como é o traballo no mar.