O colectivo Elas Eles pide a Medio Rural incorporarse á mesa de seguimento da Lei da Cadea Alimentaria

O colectivo Gandeiras e gandeiros Elas Eles, acaba de pedir á Consellería do Medio Rural ser incorporada «de xeito inmediato» ás mesas de control e seguimento da Lei da Cadea Alimentaria, tanto no sector leiteiro como no da carne. E piden a mesma presenza e interlocución que o resto de organizacións agrarias. Nun comunicado denuncian que «malia ser o elo fundamental da produción e o máis vulnerable na fixación de prezos, os produtores denuncian que se ven excluídos dos espazos onde se fiscaliza o cumprimento da lexislación vixente».

Aínda que o obxectivo principal da Lei da Cadea Alimentaria é evitar a venda a perda e protexer ao produtor fronte aos abusos de poder na negociación coa industria e a distribución; o colectivo considera imposible garantir ese control «se quen traballa a terra e coida do gando non está presente nas mesas de vixilancia».

---

---

---