«A produción ecolóxica é un modo de vida, pero ten que ser rendible»

Concha Campos, gandeira de Friol, está a comezar a produción de queixo con leite das vacas da súa explotación


VILALBA / LA VOZ

Concha Campos acadou para súa explotación, situada na parroquia de Condes (Friol), o selo ecolóxico no 2014, tras anos de xestións e de espera. A explotación, con 55 vacas en produción leiteira e máis de cen en total, leva o nome da familia e mantén unha maneira de traballar no terreo e cos animais que semella case unha continuación do que viu facer dende nena na súa casa. Por iso, as súas consideracións sobre o labor gandeiro en xeral e sobre o sistema ecolóxico en particular son unha mestura de asuntos económicos e case sociolóxcos.

«Por cuestións económicas, non paga a pena estar, e máis agora, que nos ameazan con baixar o prezo», di sobre a pertenza ao sistema de produción ecolóxico. De todos xeitos, ela emprega unha palabra, desintensificación, para describir o proceso comezado hai anos na explotación, máis orientado a un modelo extensivo . «Defender o noso sen desprezar o dos demais», di Blanco sobre o criterio con que ela e os seus socios tentan desenvolver o labor cotián.

Máis alá dos trazos que cambien no traballo cando se deixa a produción convencional, Campos subliña outros matices. «A produción ecolóxica —di— é un modo de vida, pero ten que ser rendible». Nese senso, recoñece que os gandeiros de leite téñen unha situación algo mellor ca os de carne e que estes tamén están mellor ca os produtores de horta. Afirma que o produto ecolóxico ten todos os certificados necesarios para garantir as condicións que se lle supoñen, pero engade: «O consumidor debe apoiar», comenta.

«Falta pedagoxía, mesmo nos políticos», asegura sobre as posibilidades do sector agropecuario en xeral e do ecolóxico en particular. Recoñece a conveniencia de que a xente nova se incorpore ao campo, pero sen que as cuestións burocráticas sexan unha das maiores preocupacións e garantindo un coñecemento mínimo. «Se se quere manter o rural, hai que ter formación», di.

Quedar no rural esixe, segundo ela, unha cuestión básica: «Ten que gustarche. Hai rapaces novos que se incorporan e só pensan en andar nun tractor e en traballos mecanizados. Que che gusten as novas tecnoloxías está ben, pero non cho fan todo», reflexiona. A quen pense que un productor ecolóxico, coas súas apostas algo diferentes, vive alleo ao mundo, advirte: «Movemos a economía, pero cara outro lado; movemos outro tipo de economía».

Que non se esquece a economía vese, no seu caso, na extensión da actividade á fabricación de queixo. Está a comezar a produción, que non se fai todos os días e na que se usan uns 400 litros en cada xornada. As pezas teñen un quilo de peso, e a maneira en que se ensaia a distribución é a venda directa. Trátase dun produto curado, que ela define como queixo do país e ao que lle ve posibilidades de futuro: «É un campo para medrar», cre.

Blanco, de todos os xeitos, salienta que a clave está no recoñecemento que haxa no mercado: «Ten que haber un prezo digno», subliña. Coma noutras moitas casas de Friol, na súa a elaboración de queixo xa era coñecida. «Se reparte pan, tamén ten que ser normal repartir queixo», afirma.

Newsletter Somosagro

Recibe todas las semanas la información más relevante del sector primario

Votación
2 votos
Comentarios

«A produción ecolóxica é un modo de vida, pero ten que ser rendible»