«Nunha leira dun ferrado, coa maquinaria que hai hoxe, non se pode traballar»
GANADERÍA
Cristian Seoane, gandeiro da Pastoriza, conseguiu máis terreo con axudas da Deputación. As 25 hectáreas que ten abarcan unhas 25 leiras.
09 jun 2019 . Actualizado a las 05:00 h.Cristian Seoane, de 36 anos, é gandeiro e fillo de gandeiro. A súa explotación, que ten unhas 80 vacas, está situada en San Martiño de Corvelle (A Pastoriza). Nesa parroquia comezouse a concentración parcelaria, pero non se rematou. A necesidade de terreo, pois, resulta evidente. A explotación ten arredor de 25 hectáreas de terreo, todas prados do que se obtén herba para alimento do gando. Con un plan da Deputación de Lugo conseguiu unha hectárea e media máis de terreo, que se reparte en dúas leiras e nas que traballará en aluguer durante cinco anos. Un dato resulta evidente sobre a necesidade de acadar máis terreo: as 25 hectáreas que ten están espalladas nunhas 50 leiras.
-Cre que a falta de terreo é o principal problema que sofre o campo hoxe?
-O problema non é de falta de terreo, que o hai, senón se ordenación territorial. Aquí non hai concentración parcelaria, e xa non se fará, creo. [Na parroquia estase a construír un parque eólico que tamén terá aeroxeradores na Regueira, e Seoane comenta que o que ingresarán os afectados por ocupación de terreos fai perder interese pola concentración parcelaria].
-Faríalle falta agora conseguir máis terreo para as necesidades da explotación?
-Hoxe, para os animais que teño, quizais non necesito máis. Pero se quixera aumentar o número de animais, faría falta máis terreo. Nunha explotación hai que ser autosuficiente para non depender de fóra. Pero tamén hai quen prefire facer plantacións antes que arrendar.
-Hai aínda mentalidade de minifundio?
-Botábase a culpa aos vellos;pero os que veñen detrás aínda pensan que a súa leira é mellor ca a do veciño.
-Que se pode facer contra esa situación?
-Hai que tentar xuntar leiras, comprando ou arrendando. A dispersión das leiras é un problema: é o gran problema
-Como afecta o terreo reducido no traballo diario?
-Nunha leira dun ferrado, coa maquinaria que hai hoxe, non se pode traballar. [Un ferrado equivale na Pastoriza a 504 metros cadrados].
Case 2.000 hectareas recuperadas
Un total de 1.888 hectáreas foron recuperadas na provincia de Lugo nos últimos anos para uso agrario e gandeiro. Trátase dunha iniciativa que promove a Deputación e coa que labregos interesados en dispoñer de máis terreo poden acadar axudas do organismo provincial. O sistema permite que gandeiros e agriculltores, de maneira individual ou como membros dunha agrupación de produtores ou dunha SAT, acceder a fondos. As axudas son de 500 euros por hectárea, cun máximo de 9.000 euros por cada subvención.
As axudas concédense dende hai anos, e o prazo para tramitalas este ano rematou o venres. No último reparto houbo unha partida de 300.000 euros. As axudas chegaron a todas as comarcas da provincia, coa Montaña (42 axudas, 92.300 euros achegados) en primeiro lugar e a Terra Chá (39 axudas, 85.600 euros) en segundo.