Os termos "ecolóxico", "eco", "biolóxico", "orgánico" e "bio" están protexidos e reservados en exclusiva aos alimentos obtidos da agricultura ecolóxica
Na etiquetaxe dos produtos ecolóxicos dentro da nosa comunidade deben aparecer a contraetiqueta, o código de autoridade de control e o código da entidade de control do Craega. Ademais, deben ir sempre acompañados do logotipo europeo.
Que é a agricultura ecolóxica?
- A agricultura eco é un sistema de produción que busca conseguir alimentos da máxima calidade.
- Respecta o medio ambiente e conserva a fertilidade do solo mediante a utilización óptima dos recursos e sen o uso de produtos químicos de síntese.
- Na produción vexetal utilízanse prácticas e técnicas agronómicas, biolóxicas e mecánicas, tanto tradicionais como innovadoras, que evitan a contaminación do ambiente e aumentan a fertilidade e a actividade biolóxica do chan.
- A gandería ecolóxica garante o máximo nivel de benestar animal e o respecto dos ciclos biolóxicos dos animais.
- Na elaboración dos produtos ecolóxicos transformados non se empregan aditivos nin conservantes artificiais.
Que é o CRAEGA e que facemos ?
O Craega é o único órgano encargado do control e certificación das producións ecolóxicas en Galicia e o que fan é o seguinte:
- Certificación
Certificamos as producións ecolóxicas na nosa comunidade: a produción primaria, a elaboración e a comercialización de produtos ecolóxicos para consumo humano e animal, excepto a pesca e caza extractivas, que non son certificables.
- Promoción do consumo de produtos eco
Realizamos campañas para visibilizar o sector.
Promovemos a produción ecolóxica galega fóra das nosas fronteiras.
Participamos en eventos vinculados ao sector: feiras nacionais e internacionais, foros, congresos, conferencias...
- Formación e información
Organizamos cursos e xornadas.
Participamos na iniciativa “Come Local” para a integración de produtos eco nos comedores escolares de Galicia co obxectivo de fomentar a alimentación ecolóxica dende a infancia.
Editamos carteis, folletos divulgativos, informes... e contamos cunha publicación fixa: Revista do Craega, de carácter cuadrimestral, que este outono cumpriu 58 números.
Informamos acotío a través da nosa web e das nosas redes sociais. Na actualidade temos presenza en Youtube, Facebook, Twitter, Instagram e Tik Tok
A miña cesta 100 % eco. Produtos que podes atopar co selo do Craega
- Lácteos
- Cárnicos
- Ovos
- Mel e produtos apícolas
- Viños, sidras, cervexas, licores e bebidas destiladas
- Conservas alimenticias
- Froitas, verduras, froitos secos e cogomelos
- Producións diversas
- Acuicultura, conservas e produtos do mar (algas e mexillóns)
Faite eco: decálogo de motivos para mercar produtos bio
1. Non conteñen aditivos sintéticos: os produtos ecolóxicos cultívanse sen o uso de agroquímicos e sen aditivos, son equilibrados e moi ricos en nutrientes. Diferentes estudos demostraron que non é necesaria a incorporación de substancias de síntese no cultivo ou na produción de alimentos nin na súa conservación posterior.
2. Non conteñen pesticidas: a utilización destas substancias dana o ambiente e suponlle un custo adicional á sociedade, xa que esta debe eliminar os residuos que os pesticidas deixan na natureza.
3. Non conteñen organismos xeneticamente modificados: o cultivo de organismos xeneticamente modificados pode ter consecuencias negativas para o medio ambiente. Descoñécese se a inxestión de alimentos transxénicos supón un risco para a saúde dos consumidores.
4. Respectan o medio ambiente: cando consumimos alimentos ecolóxicos, colaboramos na conservación do ambiente, xa que evitamos a contaminación da terra, da auga e do aire.
5. Son moi saborosos: viviron un proceso máis natural e desenvolvéronse dunha forma máis sa, polo que conservan o seu aroma, sabor e cor auténticos.
6. Conteñen máis nutrientes e vitaminas: conteñen uns niveis máis altos de vitaminas (especialmente vitamina C), minerais esenciais (calcio, magnesio, ferro…), antioxidantes, hidratos de carbono e proteínas.
7. Axudan a preservar a biodiversidade: é un sistema alternativo de produción que favorece a utilización de castes e razas adaptadas ao medio.
8. Respectan os animais: a gandería ecolóxica permite que os animais medren ao seu ritmo natural e nunhas condicións de vida axeitadas ao seu medio.
9. Preservan a vida rural: a práctica da agricultura ecolóxica permite unha diversificación das producións e o aumento do valor engadido do produto final. Ademais, a agricultura ecolóxica xera emprego nas zonas rurais. Os alimentos ecolóxicos fomentan a sustentabilidade social.
10. Son de calidade certificada: ademais dos controis oficiais que se lles efectúan a todos os alimentos, os produtos ecolóxicos son obxecto dunha certificación adicional que garante a autenticidade da súa orixe ecolóxica. Entidades de certificación autorizadas e supervisadas polas administracións autonómicas inspeccionan cada ano todas as explotacións e industrias agroalimentarias ecolóxicas. Nos alimentos ecolóxicos a rastrexabilidade e a autenticidade están garantidas.
Que opinan os consumidores?
O último barómetro realizado polo Consello reflicte, entre outros datos, que a poboación galega ten cada vez máis confianza nos produtos certificados e que máis do 50 % dos consumidores galegos afirman ter consumido produtos ecolóxicos durante o ano 2020, a pesar se ser o ano da pandemia
Son máis caros que os convencionais?
Nos últimos anos ese diferencial foise reducindo porque as explotacións ecolóxicas se fixeron máis rendibles; ao acadar unha superficie cun tamaño mínimo, poden colocar o produto máis facilmente e, ademais, nestes últimos anos é moito máis doado atopar os produtos eco nos lineais non só das tendas de proximidade senón tamén das grandes superficies, polo que xa é posible facer unha cesta da compra ecolóxica 100 %.
A produción ecolóxica galega, en cifras ( datos extraídos da Memoria de actividades do Craega, 2020 )
- As vendas certificadas superan os 108 millóns de euros.
- 1.320 operadores, cun crecemento do 11 % respecto de 2019.
- 32.055 ha dedicadas á produción eco.