A Academia recoñece á Fundación Barrié como a institución civil «que máis ten contribuído ao progreso da ciencia en Galicia»
SOCIEDAD
Entregalle a súa Medalla de Ouro polo seu apoio ao avance científico continuado durante 60 anos
01 jul 2026 . Actualizado a las 21:13 h.A Real Academia Galega de Ciencias (RAGC) entregou este martes a súa primeira Medalla de Ouro, a máxima distinción da institución, á Fundación Barrié en recoñecemento aos seus 60 anos de apoio á ciencia, á investigación e á educación en Galicia. O acto celebrouse no Paraninfo da Universidade de Santiago de Compostela ( USC) e a medalla recolleuna a presidenta da Fundación, Pilar Romero, de mans do presidente da Academia, Juan Lema, quen destacou que a Fundación Barrié é «historicamente, a institución civil que máis contribuíu ao progreso da ciencia e da investigación en Galicia», grazas a seis décadas de mecenado continuado. Na súa intervención, subliñou que o galardón recoñece «unha maneira de entender o compromiso con Galicia: confiar no talento, apostar pola educación, impulsar a investigación, coidar a cultura e contribuír, con xenerosidade e visión de futuro, ao progreso colectivo».
Lema lembrou tamén a colaboración que ambas entidades manteñen desde os inicios da Academia, reforzada recentemente coa creación dos Premios de Investigación Fundación Barrié-RAGC. Ao seu xuízo, estes galardóns permiten «recoñecer a mellor ciencia que se fai en Galicia, poñer en valor o traballo das nosas investigadoras e investigadores e transmitir á sociedade a mensaxe de que Galicia ten ciencia de primeiro nivel, talento e futuro».
Durante o seu discurso, o presidente da Academia reivindicou a importancia de seguir apostando polo coñecemento para afrontar os desafíos do futuro. «Nun momento no que Galicia afronta retos decisivos, desde a transición ambiental e dixital ata a retención do talento ou a innovación industrial, o exemplo da Fundación Barrié conserva plena actualidade», afirmou.
«O futuro non se improvisa; constrúese con educación, con investigación, con cultura, con colaboración institucional e cunha confianza sostida nas capacidades das persoas», engadiu o responsable da academia.
A presidenta da Fundación Barrié, Pilar Romero Vázquez-Gulías, recolleu a Medalla de Ouro das mans de Juan Lema e agradeceu un recoñecemento que definiu como colectivo. «Recibimos esta medalla con enorme gratitude e cun profundo sentido de responsabilidade. É un recoñecemento que sentimos compartido con todas as persoas que fan avanzar a ciencia co seu traballo e compromiso», sinalou.
Pola súa banda, a directora da Fundación, Carmen Arias, destacou o significado especial da distinción ao proceder da Real Academia Galega de Ciencias. «O feito de que este recoñecemento proceda precisamente da RAGC faino aínda máis valioso para nós, porque representa o recoñecemento dunha institución que simboliza a excelencia científica de Galicia e de quen consagrou a súa vida ao avance do coñecemento», afirmou.
Arias aproveitou tamén a súa intervención para reivindicar a vixencia da visión do fundador da entidade, Pedro Barrié, quen defendía que «unha sociedade industrial moderna non pode progresar sen unha adecuada investigación científica e técnica, e para que esta poida levarse a cabo é preciso apoiar centros onde os investigadores poidan traballar coas garantías necesarias». Segundo explicou, ese principio continúa inspirando o labor da Fundación no apoio á investigación e á innovación.
Ao acto asistiron, entre outras autoridades, o presidente da Xunta, Alfonso Rueda; o conselleiro de Educación, Ciencia, Universidades e Formación Profesional, Román Rodríguez; as reitoras das universidades de Santiago e Vigo, Rosa Crujeiras e Carmen García, respectivamente; o reitor da Universidade da Coruña, Ricardo Cao; e a presidenta do Consello da Cultura Galega, Dolores Vilavedra, ademais dunha ampla representación do ámbito científico, académico, económico e cultural galego.
Coa creación da Medalla de Ouro, a Real Academia Galega de Ciencias inaugura unha nova distinción destinada a recoñecer a persoas e institucións que contribúen de maneira decisiva ao desenvolvemento científico de Galicia, estreando este recoñecemento coa Fundación Barrié pola súa traxectoria de seis décadas de apoio ao coñecemento e á investigación.