O exercicio físico gaña espazo en «Tarde Piaches» da man de Virginia Torres
SOCIEDAD
O programa estrea este sábado unha sección cunha canle de consultas por WhatsApp para que o público poida enviar dúbidas sobre exercicio e hábitos saudables, que serán respondidas en directo pola adestradora
05 jun 2026 . Actualizado a las 13:41 h.Para Virginia Torres, o deporte nunca foi só unha profesión, senón unha forma de entender a vida. Natural de Rianxo e diplomada en Educación Física, iniciou a súa traxectoria desde moi nova, compaxinando os estudos universitarios coa impartición de actividades dirixidas, unha paixón que co tempo se converteu no fío condutor de toda a súa carreira.
Desde a xestión e dirección de centros deportivos ata o adestramento persoal de recoñecidas artistas como Lola Índigo ou Belén Aguilera, o seu percorrido profesional reflicte unha combinación de coñecemento, experiencia e proximidade. Unha traxectoria consolidada que recentemente sumou un novo reto: achegar a actividade física e os hábitos saudables ao público desde a televisión, ao incorporarse como colaboradora a Tarde Piaches, o magacín das tardes de fin de semana da TVG.
A súa presenza no programa vespertino, emitido de 16.00 a 20.00 horas, dará este sábado un novo impulso co estreo dunha sección fixa, un espazo que, durante os próximos meses, buscará levar o exercicio e as rutinas saudables aos fogares galegos. Todo isto cun obxectivo moi claro que a propia Torres resume nunha frase: «poñer sans e fortes aos espectadores».
«O adestramento de forza e resistencia é a mellor medicina para o corpo e a mente», afirma a preparadora, que incorporará ambas disciplinas en intervencións orientadas a demostrar que a actividade física está ao alcance de calquera persoa. «Quero que o espectador sinta que o deporte tamén é para el, transmitirlle hábitos duradeiros e romper coa crenza de que non é posible facer exercicio por falta de tempo, idade ou experiencia», explica.
Consultorio 24 horas
A pandemia marcou un punto de inflexión na traxectoria da rianxeira. Ante as restricións daqueles meses, comezou a impartir clases en formato en liña, unha iniciativa que acabou converténdose nunha parte fundamental do seu labor. Esa proximidade tamén se reflicte nas súas redes sociais, onde comparte consellos sobre adestramento e responde ás dúbidas de miles de seguidores.
Con esa mesma filosofía de interacción directa, Tarde Piaches habilitará o número 605 94 62 24 para que a audiencia poida trasladar por WhatsApp as súas consultas e participar activamente na sección. As preguntas recibidas durante a emisión serán respondidas en directo pola propia Torres, mentres que aquelas que queden pendentes terán resposta ao longo da semana, convertendo o espazo nunha sorte de consultorio aberto máis alá do horario de emisión.
Os contidos abordados variarán cada semana. Nalgúns casos estarán vinculados aos temas tratados previamente na sobremesa e, noutros, será a propia adestradora quen propoña novas cuestións relacionadas coa actividade física, a saúde e o benestar.