O concurso da TVG incorpora preguntas con imaxes e máis tensión na fase decisiva
23 mar 2026 . Actualizado a las 05:00 h.O programa Atrápame se podes mantén dende o seu comezo un obxectivo claro: descubrir canto saben os galegos sobre a súa propia terra. Este concurso de cultura xeral, emblema na grella da Televisión de Galicia, emítese de luns a venres arredor das 15:40 horas e incorpora agora dúas novidades destinadas a aumentar máis se cadra a emoción e o dinamismo: preguntas con imaxes e maior tensión no plató.
Dende hoxe, o formato da cadea pública introduce estes cambios co propósito de facelo máis visual e achegar os concursantes e espectadores á riqueza cultural, gastronómica e paisaxística de Galicia. Así, na fase dos premedores, unha das que hai que superar para levar o bote, incorpóranse dúas cuestións acompañadas das súas correspondentes imaxes, un recurso que achega maior interacción e atractivo ao desenvolvemento do espazo. A pantalla xigante coa que conta o concurso amosará as fotografías e fará moi doado ao mesmo tempo o xogo dende a casa.
Só dous dos catro concursantes que chegan a esa etapa do formato logran avanzar á cuarta fase e unicamente unha persoa acada a quinta e última: o minuto final no que en 60 segundos todos os cartos do bote entran en xogo. Este momento, de especial intensidade, coincide coa segunda novidade: o presentador abandona dende este luns o seu atril e sitúase no centro do plató para formular, cara a cara co xogador, as cinco preguntas decisivas. Se o aspirante responde correctamente a todas elas en menos dun minuto, convértese no gañador.
Á fronte deste exitoso concurso continúa Rodrigo Vázquez. O xornalista ourensán confesou en varias ocasións a súa expectación por descubrir quen levará finalmente o premio, que segue medrando cada día e supera xa os 22.000 euros: «na historia do programa houbo cuantiosos botes e xa é hora de que veñan polo de Rodrigo».
Un espazo pensado para todos os públicos
Atrápame se podes non se caracteriza só por poñer a proba os coñecementos dos galegos sobre a súa comunidade. A actualidade, a música, o cine ou os deportes son algúns dos temas que integran a batería de cuestións á que, cada sobremesa, se enfrontan tanto participantes como audiencias de todas as idades. A formulación das preguntas busca que calquera persoa interesada poida implicarse e sinta que ten posibilidades de acertar, ao tratarse de asuntos próximos e recoñecibles.
Abonda con observar a quen acode diariamente ao plató para comprobar que se trata dunha proposta dirixida a públicos moi diversos. Galegas e galegos de distintas idades e procedentes de numerosos recunchos de Galicia se animan a poñer a proba os seus coñecementos e a gozar da experiencia televisiva.
Durante o mes de febreiro, o equipo do concurso realizou varios cástings en diferentes localidades galegas. Voz Audiovisual, produtora responsable do formato, mantén aberta a convocatoria no WhatsApp do programa para quen non puido asistir e estea interesado en participar. Para facelo, abonda con enviar unha mensaxe ao número 618 388 087 deixando unha información de contacto.