Lucía Pérez consegue o bote do «Atrápame se podes» máis solidario

Iván G. Calaza REDACCIÓN / LA VOZ

SOCIEDAD

Lucía Pérez no momento de gañar o bote

O premio foi para a Asociación de Axuda a Nenos Oncolóxicos de Galicia

06 ene 2022 . Actualizado a las 05:00 h.

Atrápame se podes, o espazo presentado por Paco Lodeiro completou os seus especiais de Nadal na TVG repartindo un bote solidario de 5.000 euros na Noite de Reis. Co bo papel de Lucía Pérez, que chegou ao máis alto das escaleiras e superou a proba do Minuto final, os cartos van ser doados á Asociación de Axuda a Nenos Oncolóxicos de Galicia (ASANOG).

A cantante do Incio mostrou as súas dotes para o canto na última pregunta da Fase das escaleiras. O exame estaba equilibrado porque a eurovisiva competía con Pili Pampín. Pero a raíña da verbena galega non tivo, neste caso, a oportunidade de cantar porque Lucía foi quen de imitar a Vicente Fernández e subir ao quinto chanzo con iso de «no tengo trono ni reina, ni nadie que me comprenda, pero sigo siendo el rey».

No decisivo Minuto final a artista lucense amosouse bastante convencida cando Paco Lodeiro lle presentou os cinco temas que escondían as preguntas que debía resolver. «É alto isto», declarou Lucía cando se viu no quinto chanzo mentres agardaba polas cuestións finais. Comezou a proba de xeito excelente acertando á carreira o elemento químico máis abundante no corpo humano (osíxeno), os anos de Xosé Ramón Gayoso (65) e o cereal máis cultivado en Galicia (o millo).

Logo tivo que botar man da segunda volta para acertar as dúas seguintes cuestións. Non obstante, fíxoo con bastante marxe de tempo. Quedaban vinte e sete segundos e dúas preguntas que resolver cando Paco Lodeiro retomou de novo o tempo. «Tesme intrigada», comentaba Lucía.

De seguido, a cantante atinou coa resposta do lugar onde fora publicada por vez primeira a novela A Esmorga (Bos Aires). As dúbidas entraron cando o presentador dixo «paramos» ao contestar Lucía Pérez «Mateo» á pregunta polo único evanxeo que mencionaba aos Reis Magos. Despois duns segundos de espera, Paco Lodeiro pronunciou as palabras que xa toda Galicia repite «é correcto».

A intervención de Lucía Pérez pechou a segunda semana do Atrápame se podes edición Nadal coa participación tamén de Pili Pampín, Lito Garrido, Isi e Noelia Rey. O programa doou en total 18.000 euros a distintas asociacións benéficas; contando tamén o entregado nos días de participación de Esther Estévez, Roberto Vilar, Teté Delgado, Pepe Capelán, Trisha Fernández e Adrián Díaz.

Ademais dos 5.000 euros cedidos a ASANOG, esta semana o Atrápame repartiu 1.000 euros para a Federación Galega de Alzhéimer de Galicia; a Asociación Galega de Afectados da ELA; a Federación Galega en Favor de Persoas con Discapacidade Intelectual ou do Desenvolvemento e a Asociación de nenas, nenos e xente con diabete.

O humor e a diversión caracterizaron a primeira semana do ano no espazo conducido por Paco Lodeiro. Os cinco concursantes xeraron un moi bo ambiente e as risas estiveron aseguradas en cada momento. Ademais Pili Pampín puido estrear a súa última canción, Cantar en Nadal. Lito por dúas veces, Lucía Pérez e Isi tamén cantaron ao seren eliminados na Fase dos Retos. A actuación do cómico da Estrada o último día foi memorable emulando a Pimpinela e o seu Ao compás dunha muiñeira.

As escaleiras e Pili Pampín

A raíña da verbena galega tamén queda como a primeira concursante que se sentou nas escaleiras do Atrápame se podes. «A medida que vou subindo chanzos a miña vertixe vai medrando», comentaba Pili adaptando ao seu xeito o salto de chanzos para sentirse máis cómoda. Outro xesto que caracterizou á cantante de Rois foi que subiu sempre descalza, deixando os seus tacóns ao pé das escaleiras.

O Atrápame se podes volve este sábado ao seu formato habitual emitíndose ás 22 horas de sábado a mércores. Cinco concursantes cada semana con opcións de levar un bote que antes do Nadal quedou en 17.000 euros. Os primeiros que teñan a oportunidade de conseguilo serán Estefanía de Cabana de Bergantiños, Pablo de Melide, Ana de Narón, Chema de Maceda e Fanny da Coruña. Todos aqueles interesados en concursar poden enviar un correo a atrapamesepodes@crtvg.gal.