O exitoso concurso que se emite na TVG chega esta noite ao programa número 100 cun bote de máis de 10.000 euros
10 nov 2021 . Actualizado a las 10:12 h.Numerosas persoas acudiron onte martes ao casting presencial aberto para participar no Atrápame se podes, o concurso de maior éxito no prime time da Televisión de Galicia. Os candidatos pasaron polas instalacións da produtora Voz Audiovisual no Polígono de A Grela na Coruña coa intención de facerse un oco no espazo presentado por Paco Lodeiro.
As persoas interesadas foron cuestionadas polos seus intereses e afeccións, ademais de demostrar as súas dotes para o canto ou contar anécdotas e chistes. Varios dos participantes serán chamados para concursar en vindeiras gravacións do formato.
A maiores deste cásting presencial, o espazo televisivo segue ofrecendo a posibilidade de coñecer candidatos con sentido do humor e gana de pasalo ben a través do seu enderezo electrónico. Os interesados poden enviar os seus datos de contacto, incluíndo nome completo, teléfono, idade, lugar de nacemento e ocupación a atrapamesepodes@crtvg.gal.
O Atrápame se podes continúa co seu éxito nas noites da TVG de sábado a mércores. De feito, o pasado sábado batiu o seu récord de espectadores e alcanzou a cifra dos 166.000 televidentes cun 19,6 % de share.
Esta semana o programa superou os 10.000 euros de bote. E hoxe mércores terán a última oportunidade de levalo Miguel, da Pobra do Caramiñal; Iago, de Carral; Ramón, de Redondela; Nieves, da Coruña; ou Laura, da Illa de Arousa.
