Agustín Vázquez, director de Viajaragusto: «Son moi boas noticias para o sector e para Galicia»
SOCIEDAD
«Que fariamos sen turistas? Ata a localidade máis pequena loita por eles»
A presentación dun seguro gratuíto para os viaxeiros que elixan Galicia como destino turístico chega nun momento crucial para o sector do turismo. Agustín Vázquez, director da axencia de viaxes Viajaragusto, explica que estamos ante unha iniciativa moi positiva para recuperar a confianza dos turistas. «E iso é no que hai que continuar traballando», recoñece.
-É unha boa nova para o turismo?
-Si, unha magnífica noticia. Primeiro para Galicia, pois o turista é un prescritor boísimo para calquera comunidade. Son moi boas noticias para o sector e para Galicia. Nestes tempos onde a economía non flúe ben, que chegue un viaxeiro a Galicia e se suba nun avión, durma nun hotel, vaia a un restaurante e faga compras nunha zona comercial... Todo isto deixa ingresos en moitos puntos diferentes. Que fariamos sen turistas? Ata a localidade máis pequena loita por eles.
-Axudará este novo seguro financiado pola Xunta a que máis turistas se animen neste 2021 a visitar Galicia?
-Esta axuda é moi boa para atraer aos turistas e que veñan a Galicia. E dalgún modo isto tamén nos axuda a nós, as axencias de viaxes, pois poderemos ofrecerlles outros servizos que non contrataran, como por exemplo experiencias, visitas programadas ou catas de viño.
-Unha iniciativa boa, entón, tamén para as axencias.
-Isto é moi positivo que fará que veñan máis turistas. Para as axencias é bo este seguro para atraer o turismo. Porque se non hai viaxeiros, a quen lle imos vender nada? Cando unha soa persoa entra no negocio, xa é bo e positivo.
-Cal é a importancia de contratar un seguro cando se viaxa?
-Eu son defensor do seguro, pois achega moita seguridade. Imaxina que vas a outro país e comezas a atoparte mal. Co seguro estás cuberto e non tes que preocuparte. E con esta pandemia, aínda gaña máis importancia a seguridade.
-Recoméndallo aos seus clientes?
-Si, sempre. Depende da súa idade, para os máis novos o seguro non ten gastos medios tan altos. Cunha idade avanzada, as coberturas teñen que ser maiores. Tamén inflúe o destino, non é o mesmo viaxar pola Unión Europea que por Estados Unidos, onde unhas gotas de colirio poden custar ata 300 dólares. Os días que pasará o viaxeiro fóra tamén deciden o tipo de seguro.