Bolseira da Asociación Española Contra el Cáncer, Jenifer Brea estuda as secuencias de ADN móbiles
15 ene 2020 . Actualizado a las 05:00 h.Jenifer Brea Iglesias (A Estrada, 1996) poderá dedicarse ao seu doutorado ao 100 %. «Este tipo de bolsas permiten que non teñas que facer outro traballo e que te poidas centrar na investigación, por iso son imprescindibles», explica esta alumna da USC. É unha das beneficiarias das bolsas da Asociación Española Contra el Cáncer para investigación, cunha cantidade de 60.000 euros.
-Que a levou aquí?
-O interese por saber como funcionamos. Unir a xenética coa loita contra o cancro é algo que te anima moito a meterte aquí, nun doutoramento desde estilo. Os beneficios derivados poden ser moi grandes.
-En que consiste o proxecto que ten entre mans?
-Estudamos secuencias de ADN móbiles que se desprazan da súa rexión a outra rexión do xenoma. Ao desprazárense, alteran esas rexións nas que se integran. Esas secuencias nas células sas están bastante controladas, grazas a mecanismos que foron desenvolvendo as células ao longo da evolución das persoas. Pero as células tumorais deixan de estar tan controladas, debido ás alteracións ás que están sometidas.
-Que consecuencias ten iso para que opte por investigalas?
-Ás veces, ao desprazárense, arrastran consigo fragmentos adxacentes a elas. Nalgunhas ocasións hai neses fragmentos secuencias reguladoras que o que fan é controlar se os xenes se expresan ou non.
-Que relevancia ten iso para frear o cancro?
-Iso é o que queremos ver nós con toda esta investigación. Ás veces esas secuencias que arrastran son reguladoras, e van controlar que determinados xenes se expresen ou non. Nós queremos estudar se a mobilización facilita a expresión de oncoxenes, que son aqueles que favorecen o desenvolvemento dos tumores. A clave de todo consiste en saber se ese é un mecanismo tumoral ou non.
-Se iso se confirma, que se pode adiantar?
-Unha vez que se coñeza isto, con estudos máis profundos, pode levar á procura de dianas terapéuticas e ao desenvolvemento de estratexias para mellorar a vida dos pacientes que teñan alta incidencia destas secuencias móbiles.
-É o estudo do ADN un dos campos más importantes na loita contra o cancro?
-A xenómica é unha das principais vías que nos leva a unha medicina personalizada. Podemos diagnosticar de forma máis eficiente a cada paciente. O cancro é un conxunto de enfermidades diferentes. Canto máis preciso sexa o diagnóstico e o posterior tratamento máis rápido actuará este. E farao cunha menor toxicidade e unha maior efectividade.
-Despois diso, que virá?
-De confirmarse, habería que tratar de utilizar os coñecementos para aproveitar estas secuencias como biomarcadores para os pacientes. Así poderíase diagnosticar, tratar e seguir a todos os pacientes dunha maneira moitísimo máis eficaz.