Javier Veiga: «Todo o mundo quere facer televisión porque quere chegar ao público»

Estrea «Pequeñas coincidencias», a primeira serie española da plataforma Amazon Prime


Santiago / la voz

Un home e unha muller están destinados a coñecerse. Ou non. E a ter fillos. Ou non. Todo depende dunha serie de Pequeñas coincidencias, o título da serie de Javier Veiga (O Grove, 1973) que é a primeira española que estrea a plataforma Amazon Prime e que no seu creador produce orgullo, pero tamén un chisco de medo.

-A serie fala dun tema moi actual, que é se ter fillos e cando.

-É un tema novo, porque para meu pai non existía. Non había esta dúbida, tiñas fillos porque non había outra. E se non os tiñas había algo raro, preguntaban se che pasaba algo. Dubidar de se ser pai ou nai ou non é un tema actual, é algo da nosa xeración, e entendendo xeración como algo moi amplo, porque a idea de ter ou non fillos hai xente á que lle aparece con 20 anos e a outros ata con 60 ou 65 anos. E nas mulleres, que antes tiñan unha marxe máis estreita e agora é moito máis ampla. É un tema que está na miña mente e que está no meu contorno, e quixemos facer algo sobre esta gran dúbida que é difícil de responder. Se a tes, non ten resposta.

-Saen aí uns fillos mentais...

-[Ri] Hai unha pequena chiscadela de estilo, que é que eu falo coa filla que imaxino que chegarei a ter. No fondo non é máis que a miña conciencia, que me di as cousas que eu quero escoitar, ou máis ben que non quero escoitar, que é o que me vou perder se non chega a existir. Esa chamada da natureza facémola totalmente corpórea.

-Son oito capítulos de 50 minutos e cunha trama pechada. Este novo xeito de producir condiciona o proceso creativo?

-Fixemos un piloto sen ter o formato vendido e a duración xurdiu de xeito natural con 50 minutos. Non é unha comedia de gag nin de sitcom. É unha historia que está por riba da comedia. É unha historia contada cun ton cómico. Efectivamente, cando sabes que tes 8 capítulos de 50 minutos sabes que tes 400 minutos para contar unha historia É como contar unha película moi longa ou unha serie moi curta [ri]. Isto facilita moito esa parte creativa, a de escribir ese arco de tramas, a historia, que é a máis bonita.

-O venres xa se poderá facer maratón.

-É unha cousa que me fai moita graza, imaxinar que hai xente que esta fin de semana xa a verá completa.

-Está entre dous mundos, porque tamén a emitirá Atresmedia pola televisión convencional.

-Como é unha coprodución entre Amazon e Atresmedia, estréase en Amazon e a temporada que vén, sen data e sen canle aínda, poderase ver aí. Pero a xente que non quere que lle fagan spoilers que a vexa canto antes [ri].

-Outra cousa diferente: gravouse enteira en localizacións reais.

-Teño a sensación de que na comedia tiñamos este tipo de contas pendentes. É verdade que nas series dramáticas a evolución que houbo nos últimos anos en España é espectacular, e na comedia seguiamos un pouco máis enganchados aos mesmos preceptos. Empézanse a abrir este tipo de formatos, distintos, como esta comedia en que todo está gravado en localizacións reais, algo que require máis tempo e que é máis complexo, pero que lle dá outro look, non digo que nin mellor nin peor. Está tamén Arde Madrid, ou Vergüenza, Capítulo 0... Empezan a aparecer comedias que buscan a ese público distinto, ao que ao mellor non lle gustaba ese tipo de comedia ou que quere outro tipo de preguntas.

-É a televisión onde se fai hoxe ficción de calidade?

-Vou dicilo dun xeito moi galego: hoxe en día a televisión caga por riba do cine [ri]. A grande evolución está na televisión, pero non porque sexan mellores ou peores, senón porque a demanda manda na oferta e agora a xente pide televisión, co que os grandes profesionais, todo o mundo, quere traballar en televisión porque quere chegar ao público.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
39 votos
Comentarios

Javier Veiga: «Todo o mundo quere facer televisión porque quere chegar ao público»