Cristina Palacios: «En dous anos pasaron 55 ou 60 menores pola asociación, os menos co apoio das familias, iso é o triste»

A presidenta da asociación Arela está totalmente en contra de que se patoloxice algo natural como a transexualidade ao esixir un informe psicolóxico


Santiago / La Voz

A presidenta de Arelas, a asociación de familias con menores trans, Cristina Palacios, está totalmente en contra de que se patoloxice algo natural como a transexualidade ao esixir un informe psicolóxico, como se fai no Sergas, e lamenta que a maioría dos rapaces que chegan ao seu colectivo o fagan sen o respaldo das súas familias. Este colectivo entregou á Administración sanitaria as súas propostas de protocolo, aínda que de momento non teñen novas de cales delas se recollerán no documento final.

-Pídese no protocolo preservar a identidade e intimidade do menor no Sergas, ¿como?

-Na actualidade se unha persoa non ten cambiado o seu nome legalmente e vai ao médico, se a este lle apetece seguirlle chamando polo nome legal, pode facelo. Imaxínate nunha sala de espera que unha enfermeira di un nome masculino e aparece unha rapaza. O Sergas di que é moi complicado modificar na tarxeta sanitaria o nome se non está cambiado legalmente, pero polo menos respectar que se un rapaz quere que se lle chame dun xeito na consulta, se faga.

-En Galicia séguese a precisar un informe psicolóxico para iniciar o tratamento, ¿está en contra?

-En Cataluña xa se eliminou ese requisito, na comunidade valenciana van aprobar unha lei no mesmo sentido e na de Madrid tamén se recolle que non sexa necesario, aínda que non sei se se cumpre. Pasar por un psicólogo é patoloxizar algo natural, a ninguén se lle ocorre mandar a un homosexual a un psicólogo, ¿por que a unha persoa trans si?

-O Sergas buscará un centro de referencia para tratar a menores trans, ¿é unha boa nova?

-Ter un centro de referencia para que os profesionais estean especializados en certas operacións, para que se faga investigación e se forme a xente entón si, pero se é para convertelo en auténticas comisarías do xénero que deciden quen é muller e quen é home, non. Non te podes nin imaxinar as preguntas que se lles fan ás persoas trans.

-¿Cantos menores trans hai en Galicia?

-Os estudos que se están tomando como bos falan de que hai un por cada mil menores, polo que nacerían cada ano entre 30 e 35 en Galicia. En Arelas en dous anos pasaron 55 ou 60 menores, uns con familias, os menos, iso é o triste. É moi complicado traballar con menores que non teñen o apoio familiar, pero desgraciadamente son os que máis se achegan a Arelas. En global é moi complicado saber os que hai porque é unha poboación moi invisibilizada, mesmo polas familias.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
4 votos

Cristina Palacios: «En dous anos pasaron 55 ou 60 menores pola asociación, os menos co apoio das familias, iso é o triste»