«A Starting Grant é como gañar a Champions, e unha Ramón y Cajal é como gañar a liga»

Diego Martínez Santos (Foz, 1983) vén de obter a Starting Grant do Consello Europeo de Investigación (ERC) a unha idade relativamente nova, o que fala a favor dos seus méritos para acceder a un programa de elite da ciencia europea, talento que non foi recoñecido en España para lograr un contrato Ramón y Cajal, para o que este ano só se seleccionaron a 17 científicos para toda España nas áreas de física e ciencias do espazo, o que tamén significa que moitos investigadores de valía quedaron fóra. «Ao final amañeime eu so, pola miña conta», advirte Martínez Santos. Cumpriu o seu obxectivo de retornar a Galicia e prefire deixar a un lado as polémicas. O focense foi elixido polo comité de expertos europeo encargado de examinar aos candidatos, segundo a carta que hai uns días remitiulle o presidente do ERC, aínda que haberá que esperar a que lle concreten a subvención que lle outorgarán, que oscila entre 1,5 e 2 millóns de euros.

-As Starting Grant concédense a proxectos innovadores, na fronteira do coñecemento. ¿Cal é a súa proposta?

-E unha expansión das medidas que se poden facer no LHCb, un dos experimentos do CERN, buscando desintegracións que desafíen as predicións do modelo estándar de física de partículas. A día de hoxe sabemos que o modelo estándar non e unha teoría completa. Entre outras cousas, non inclúe unha descrición de como funciona a gravidade a nivel cuántico, non explica a materia escura. No CERN buscamos pistas que leven a un modelo mellor e a miña proposta permitirá almacenar e analizar unha serie de desintegracións do quark s, que ata agora non era posible estudar. Estas desintegracións axudarannos a construír ou descartar modelos alternativos ao estándar.

-Aínda estás contratado ata outubro do 2015 polo instituto holandés Nikhef, ¿cre que terá problemas para traer o teu proxecto a Galicia?

-Non o creo. Falarei con eles para poder marchar uns meses antes e supoño que non haberá problemas. A miña idea sería empezar en Santiago entre maio e xuño do ano que ven.

-Este ano volveron a denegarlle un contrato Ramón y Cajal para retornar a España. ¿Déronlle algunha explicación sobre os motivos?

-Non o mirei, que fagan o que queiran. Non entendo moito, pero tampouco me preocupa. Unha Ramón y Cajal é algo moito peor que unha Starting Grant, ou que as posicións posdoutorais que tiven nos últimos anos. Se non ma quixeron dar, problema deles.

-¿Pero non entende que é unha incongruencia que non aceptaran a súa proposta, que sí recoñece Europa, cando é un programa para que retornen a España investigadores cualificados?

-No meu caso non funcionou, pero chegado este punto dame un pouco igual. Unha Starting Grant é moito mellor, é como ganar a Champions e o Ramón y Cajal é como gañar a liga.

-Pero da a impresión de que para obter un contrato Ramón y Cajal e volver a España hai que ter currículo de Nobel.

-Penso que non é un problema de currículo. Os que recibiron as Ramón y Cajal non tiñan un currículo mellor que o meu.

-A Xunta sacou un novo programa para captar talento. ¿Podería acollerse a el?

-Pode ser unha opción.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
11 votos

«A Starting Grant é como gañar a Champions, e unha Ramón y Cajal é como gañar a liga»