Os muros ao aire e os espazos públicos con pouco xeito non están só nos núcleos urbanos, xa que o rural, escaso de mocidade, tamén ten recunchos que necesitan un bo apaño. Darlle unha volta a iso é no que traballa a arquitecta Sandra González co seu proxecto A Vila do Mañá, que quixo desenvolver no municipio de Touro. A súa idea foi ben acollida, pero tivo que adaptarse á realidade deste concello e así xurdiu un novo proxecto no que todas as partes implicadas puxeron moito da súa parte para que o resultado fose un éxito.
Un dos cambios foi que no proxecto participase un grupo de adolescentes para facer varios deseños de arte urbana. E foi o que fixeron, maila que antes tamén tiveron que traballar a reo para dispor dos muros como se fosen un lenzo branco, polo que houbo que botarlle unhas boas capas de pintura e tamén algunha limpeza de musgo. «Eu nunca usara un rolo», recoñecía Sandra González mentres facía a visita guiada polos distintos murais que agora danlle outro xeito ás rúas e prazas de Fonte Díaz, nas que van quedar para a posteridade. A primeira parada foi na praza de Martín Códax, na que unha das súas cantigas complementa o deseño que reflexa a Noa, unha das rapazas que formou parte do proxecto, que mudou varios dos espazos con nomes de referencia da literatura galega.
Como o resto de traballos, todos teñen escala humana, porque esa é a filosofía do proxecto que comezou en Rianxo no 2016 e que en Touro tamén é posible grazas a unha subvención autonómica do departamento de Normalización Lingüística.
