Borja Verea: «Santiago está paralizado. Bugallo foi un bo alcalde, pero do século pasado»

o. p. arca SANTIAGO / LA VOZ

SANTIAGO CIUDAD

XOAN A. SOLER

O candidato do PP á alcaldía de Compostela considera que a política de vivenda na cidade «é un gran fracaso»

22 may 2022 . Actualizado a las 23:40 h.

Borja Verea (Santiago, 1980) é o flamante presidente do PP de Santiago, e candidato á alcaldía dentro dun ano. Ten o reto de chegar ás eleccións cun partido cohesionado que sexa quen de acadar nas municipais uns resultados semellantes aos que os populares obteñen en convocatorias autonómicas e estatais.

—Leva tempo recorrendo cidade e rural. Que sensación percibe na cidadanía da xestión municipal?

—A cidade non deixa de ser un reflexo dos seus gobernantes e dos seus responsables públicos. Polo tanto, a cidade está durmida, cansada e frustrada. Penso que hai unha gran decepción, incluso dos propios votantes do actual equipo de goberno. Na miña opinión, hoxe Santiago é unha cidade completamente paralizada, que non ten proxecto de futuro e que necesita espertar. O que nós imos tratar neste ano é de convencer á xente que somos a alternativa de cambio e o voto de futuro.

—A que atribúe ese estado?

—O actual proxecto do equipo de goberno xa foi rexeitado polos propios veciños no ano 2011. Polo tanto estamos ante unha secuela, un capítulo final, que o que demostra é que o actual alcalde foi un bo alcalde, pero do século pasado.

—Vostede está na rúa, pero non en Raxoi. É complicado ser aspirante á alcaldía sen poder confrontar directamente con Bugallo?

—Son deputado autonómico, polo tanto, son representante da cidade no Parlamento de Galicia, e tamén é un xeito de defender os intereses de Santiago. Estou recorrendo a cidade e xa cos focos de presidente local e candidato espero que sexa un pulo importante para poder ofrecer aos veciños esta alternativa que pasa por min.

—No Peleteiro defende máis equipamentos e servizos públicos. A que prazos abocaría un plan tan distinto ao que se negocia?

—Os únicos que non cambiamos de criterio na parcela do Peleteiro fomos nós: sempre dixemos que ten que ser o novo motor económico e social do Ensanche, e iso pasa por reformular completamente a proposta. O que non ten ningún sentido, e é unha auténtica barbaridade, é pasar de 50 a 150 vivendas, e o que se está discutindo agora é un debate falso de cara onde abren dous mamotretos que queren poñer alí. Nós apostamos por máis equipamento social, máis espazo público para os veciños, que pode ter moitas posibilidades: centro de maiores, zonas deportivas (incluso ximnasio e piscina pública), pasando por un auditorio ou teatro multiusos, unha praza, zonas infantís ... En canto a prazos, habería que sentarse coa propiedade, traballar e chegar a un acordo.

—Pero cre que a propiedade sería receptiva a ese plan?

—Habería que sentarse con eles, utilizar todos os mecanismos administrativos e legais que ten o Concello, e chegar a un acordo que sexa de interese para toda a cidade. O que temos agora sobre a mesa é un beneficio para a propiedade, que é importante lembrar que non deixa de ser un fondo de investimento.

—Fala tamén de reter en Santiago aos seus veciños. Como se acada?

—A política de vivenda en Santiago é un gran fracaso. Unha das prioridades do meu futuro goberno será esta política de vivenda, que ten que ser accesible e de calidade. Temos que conseguir que a xente nova, xente con fillos, se quede en Santiago; que os veciños e as familias que naceron en Santiago non sexan expulsados aos municipios limítrofes. Isto pasa por nova construción, pero tamén, sobre todo, por rehabilitación e chegar á colaboración público-privada, con rendas garantidas ... Hai diferentes modelos en moitas cidades, que suporía ter un banco de aluguer accesible para as familias.

—O turismo é un motor económico para a cidade, ou tamén a principal causa de éxodo dos composteláns?

—O turismo é un valor importante na cidade de Santiago, pero temos que ter a nosa propia política de turismo. Agora mesmo faise un seguidismo absoluto da da Xunta, e incluso estatal, pero non existe política de turismo en Raxoi. O turismo ten que xerar riqueza pero temos saber aproveitala para que quede na cidade, repartida nos principais sectores de Santiago. Temos o caso do casco histórico: ten que aproveitar esa riqueza para xerar e mellorar o seu valor residencial. Nesa política propia hai que conseguir uns visitantes de maior valor engadido, que deixen maior riqueza, e con ela reforzar as debilidades da cidade histórica, que é esa perda de identidade. E hai que apostar por unha programación cultural de alto nivel, de vangarda, que non temos: unicamente temos a axenda que nos pon a Xunta de Galicia.

«Nesta ocasión no PP vamos traballar todos unidos»

As vivendas de uso turístico (VUT) levan tempo no debate público. Esta é a opinión de Verea:

—O peor que se pode facer en xestión pública é titubear e dar bandazos, que é o que pasa nas VUT: o concello insiste en que están prohibidas, e vemos que hai un milleiro abertas ao público. Polo tanto esa prohibición é unha tomadura de pelo para os veciños de Santiago. O que hai que traballar é cara un mix turístico que ten que contar coas VUT porque son imprescindibles no turismo postpandemia. Agora ben, teñen que estar limitadas, reguladas e proporcionadas.

—Que servizos ve como unha prioridade mellorar?

—A cidade non está igual que hai tres anos. Está peor. Servizos básicos que deben ter uns mínimos de calidade non se cumpren en Santiago, como a limpeza e recollida de lixo, o transporte público, ou a renovación do contrato da auga, que podería beneficiar á contorna rural. Non foron capaces neste mandato de actualizar ningún destes contratos. Este goberno tivo a oportunidade de aproveitar o malestar que xeraron os das mareas, pero é moi difícil atopar algunha cuestión que mellorase na cidade.

—Cun apoio do 99 % na presidencia do PP, sente o partido unido?

—Sen dúbida. Foi un proceso modélico de democracia interna, onde calquera compañeiro puido presentarse con 25 avais. Xa na primeira parte do proceso a militancia apostou sen fisuras pola miña candidatura, co 90 % de avais presentados. E na votación a aposta dos compañeiros foi pola unidade, pola renovación e por traballar pola maioría absoluta.

—Como valora que Fernando Mayo non se integrase na súa xunta?

—Unha decisión persoal, lexítima, que eu respecto e sobre a que el deu as correspondentes explicacións. En todo caso, o apoio da militancia quedou claro na presentación de avais e na votación.

—Todo o PP remará a unha nas municipais do 2023?

—Estou convencido de que o ambiente é diferente, que nesta ocasión vamos traballar todos unidos. O reto é a maioría absoluta para gobernar Santiago: aquí non sobra ninguén, somos todos necesarios.

—Foi 9 anos secretario xeral técnico en Economía. Asumiría estar catro anos na oposición?

—Nós contamos con acadar maioría absoluta, con gobernar a cidade e con ser eu o próximo alcalde de Santiago. En todo caso, se os veciños queren continuar co actual goberno socialista, estarei onde os veciños decidan.