Rafael Brantuas: «A experiencia favorece a formación das persoas maiores desempregadas»

O profesor dos cursos de cociña do CIFP Compostela destaca o éxito deste programa pola integración laboral dos participantes


Santiago / La Voz

No Centro Integrado de Formación Profesional (CIFP) Compostela está a finalizar o último dos catro cursos para persoas desempregadas que organizou os últimos meses, de cociña. O alumnado que finaliza con éxito consigue o certificado de profesionalidade, que lles amplía as expectativas laborais. Rafael Brantuas é o docente que se ocupa das últimas aulas: «De 15 que comezaron, 9 conseguiron traballo no verán e abandonaron o curso, restan só 6. O módulo que lles dou é o último, de decoración e presentación de pratos. Antes ensinaron outros colegas do centro, que lles indicaron como preparar peixes, carnes e máis alimentos; e agora que teñen coñecementos para cociñar é cando me ocupo de que que aprendan a facer unha boa presentación», explica.

Este curso dura 828 horas, con 80 de prácticas en empresas. Os outros tres (de impresión gráfica, repostaría e operacións básicas de restaurante e bar) eran máis breves. «Todas as persoas que participan son demandantes de emprego e desempregadas. O obxectivo é que podan ter unha ocupación. Co certificado de profesionalidade é máis fácil que as contraten. Tamén poden continuar estudos e facer o ciclo medio de cociña, no que se lles validan varios módulos; ou montar un negocio», acrecenta.

Rafael é un docente veterano do CIFP Compostela. Foi dos pioneiros da aula de investigación e demostración do centro, onde participou en proxectos innovadores como o de conservación ao vacío de lacón, polbo e outros alimentos tradicionais do país para a súa comercialización como precociñados ou, máis recentemente, na elaboración de hamburguesas con mel, castañas e outros produtos de calidade e ecolóxicos. Estes cursos para persoas desempregadas teñen un alumnado moi diverso, mesmo de idades xa avanzadas, que levan anos sen relación cos estudos. Iso non é un obstáculo, afirma Rafael: «A experiencia favorece a formación das persoas maiores desempregadas. Teñen polo xeral máis responsabilidade, notaron a crise e o estar sen emprego, e iso contribúe para que se poñan ao día», manifesta.

Neste curso, que principiou en maio e finaliza en outubro, teñen mesmo inmigrantes: «Hai unha alumna de Rusia e outra de Venezuela, que queren traballar aquí. Para as persoas que finalizan estes cursos despois é máis fácil que as chamen para un posto de traballo». Os establecementos do Sistema Público de Emprego seleccionan o alumnado.

«Hai dous anos tivemos un curso como este e a metade do alumnado traballan. Comezan como axudantes de cociña e teñen una progresión rápida, porque pola súa preparación poden asumir a responsabilidade da cociña dun establecemento pequeno ou mediano sen problemas. De quen finalizaron en 2016 están a traballar na praza, en hoteis da cidade e algún mesmo puxo un negocio», acrecenta Rafael.

Unha evidencia das posibilidades de emprego é que chamasen a 9 dos que comezaron este curso: «Procuramos finalizar a formación no primeiro semestre, porque no verán hai moita demanda para traballar na cociña ou na hostelaría. Neste caso non houbo esa posibilidade, por ser un curso de moitas horas. E un 20 % deste alumnado continúan estudos para conseguir un título de FP, que lles abre máis portas», indica Ramiro Esparis, director do CIFP Compostela. Eva Burgos, unha das alumnas que está a acabar o curso de cociña, adianta que ela e unha colega pensam facer o ciclo medio de cociña, pola oferta modular de adultos do centro este próximo curso. Eva antes traballou en postos administrativos, e agora pensa en «poder montar algún negocio relacionado coa cociña», di.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

Rafael Brantuas: «A experiencia favorece a formación das persoas maiores desempregadas»