Sandra Golpe: «A prevención do consumo de drogas debería comezar antes dos 13 anos»
SANTIAGO CIUDAD
Esta psicóloga defende que se asocie ao uso problemático de Internet, pois comparten parte das causas
01 may 2018 . Actualizado a las 05:00 h.«Os adolescentes que chegan pola noite máis tarde á casa e que cando saen levan máis diñeiro para gastar, teñen maior probabilidade dun consumo de risco de alcohol e outras drogas, e son os que máis consomen», afirma a psicóloga Sandra Golpe. Esta é unha das conclusións dos estudos que realizou os últimos anos na Facultade de Psicoloxía para a súa tese de doutoramento, orientada polos profesores Jesús Varela Mallou e Antonio Rial Boubeta. Estudou o consumo de drogas e o uso problemático de Internet en adolescentes e como facer prevención, pois «hai evidencia de que son dous dos principais problemas sociosanitarios de Europa», afirma.
Sandra participou en 13 publicacións da Unidade de Psicoloxía do Consumidor e Usuario os últimos cinco anos. «A parte principal do meu traballo foi sobre o consumo de alcohol e outras drogas. Verificamos como cada vez comeza antes. O recente relatorio Estudes, do Ministerio de Sanidad, centrado nos dous últimos anos, sitúa as idades de inicio entre os 14 e os 15 anos. Nós investigamos con máis de 3.000 adolescentes galegos, entre 12 e 18 anos, e comprobamos que son inferiores, normalmente comezan co consumo de alcohol por volta dos 13 anos e medio, inmediatamente despois o de tabaco, e a partir dos 14 noutras substancias, en especial o cannabis, que coincide coa primeira bebedeira excesiva de alcohol», indica.
Por iso «a prevención do consumo debería comezar antes dos 13 anos; ao final da educación primaria. Iso é importante, pois detectamos adolescentes que fan un consumo moi intensivo e abusivo de alcohol e outras drogas, que pode desembocar nunha dependencia ou nun trastorno».
Sandra traballou cunha ferramenta para verificar o consumo de risco de alcohol en persoas adultas, que adaptou para identificar de maneira precoz ese consumo en adolescentes: «é unha ferramenta da OMS, que agora se pode utilizar con garantías con poboación adolescente española», manifesta.
Outro resultado dos seus estudos foi que «vimos a existencia de relación entre uso problemático de Internet e consumo de risco de alcohol e outras substancias. Iso interesa para a prevención: debe ser máis integral e incidir sobre as causas compartidas para evitar ambas as problemáticas; iso é máis eficaz que actuar sobre elas independentemente, e aínda non se traballa demasiado así».
Sandra valora positivamente a lei estatal, aprobada hai uns días, que regula o consumo de alcohol e outras substancias: «había unha lei galega de hai xa uns anos, que en parte non tiña éxito por falta dunha referencia estatal. Para temas de saúde pública como estes penso que é bo que haxa normas que regulen usos e consumos».
Esa nova lei estatal axudará para a prevención, di. Considera que «a prevención ten que contemplar moitos ámbitos. Primeiro, as institucións, con leis e normativas que regularicen esas cuestións, ou a publicidade, e outras que non dependen da cidadanía. Teñen moito que facer tamén os centros educativos, onde se debe integrar dunha maneira transversal a prevención. E os pais e as nais, que na súa responsabilidade de educar teñen que impor normas e límites, e ser bos modelos, pois se consomen drogas hai máis probabilidade de que o fagan os fillos».
Salienta así mesmo «os irmáns e o grupo de iguais, pois se consomen alcohol ou outras substancias favorecen que se consuma». E ve básico «traballar as variábeis persoais do adolescente, contar cos seus gustos, actitudes, hábitos, opinións, autoestima e habilidades sociais; e son moi importantes as expectativas que se fan sobre o consumo de drogas, sobre todo pola publicidade. Porque vimos que coñecen os riscos do consumo; porén, pensan que os poden asumir, porque lles compensa; por iso hai que incidir ben neles, para que muden».
Investigadora. Sandra Golpe Ferreiro é licenciada en Psicoloxía pola USC. Desde finais do 2013 investigou na Unidade de Psicoloxía do Consumidor e o Usuario.
Estudo. Defendeu como tese de doutoramento o estudo «Consumo de drogas y uso problemático de Internet en adolescentes».