Fernando Rey: «Formamos alumnado entre 3 e máis de 80 anos que non vén por un título»

Destaca as posibilidades de compartir agora sede co centro de Altos Estudos Musicais


SaNtIaGO / LA VOZ

«Este edificio ten agora moita máis vida», afirma Fernando Rey, trompetista e director da Escola Municipal de Música, ao ser preguntado polo primeiro trimestre en que compartiron sede coa Escola de Altos Estudos Musicais, en Vista Alegre. «Agora continúa a vir xente nova, que finalizou os estudos superiores e acoden para se especializaren no centro de Altos Estudos Musicais. E o noso incorpora estudantado moi diferente: formamos alumnado entre 3 e máis de 80 anos que non vén por un título, senón por moi diversos intereses pola música. Ensinamos en 20 especialidades, para as que traballamos 21 docentes», acrecenta.

A pesar do pouco tempo con que realizaron a mudanza, este verán, desde as anteriores instalacións que compartían co colexio Apóstolo Santiago, resultou ben, manifesta: «Comezamos o curso sen demora, e fixemos toda a programación. En outubro iniciamos os concertos, cunha actuación no exterior, orientada para a veciñanza, con participación de case todas as nosas agrupacións. E fixemos microconcertos na festa de Santa Cecilia, participamos na campaña Compostela en negro e en actividades por vítimas da violencia de xénero, ofrecemos un concerto para o cuarto ciclo da USC, as audicións trimestrais, ou unha actuación de panxoliñas hai uns días».

A Escola ten 420 estudantes. En xaneiro prevé un incremento, para participar nun novo ciclo de cámara «que se abre para o alumnado e para persoas do exterior, co obxectivo de formar pequenos grupos, a partir de 4 músicos: de trompetas, de metais, de vento, de corda ou outros. O curso pasado con esa oferta aumentou o alumnado e confiamos que agora aconteza o mesmo. E para o próximo curso temos a vontade de incrementar a matrícula, pois tanto o Consorcio como o Departamento Municipal de Educación, que xestionan os dous centros que agora compartimos sede, están a favor diso», di.

De feito, acrecenta, para o ciclo de cámara que principia en xaneiro «xa poderemos dispor de dúas aulas máis. E de se organizaren ben as actividades e os horarios, entendo que o edificio ten aínda máis posibilidades».

Fernando defende que a Escola Municipal de Música teña una asociación de nais e pais do alumnado. Nos finais do curso pasado foi considerada esa posibilidade «e estaría ben que se constituíse». As familias do alumnado utilizan o estacionamento do Auditorio de Galicia varias horas pola tarde, excepto os días de concerto; e tamén se lle habilitaron algúns espazos para que podan esperar.

A Escola Municipal funciona sobre todo en horario de tarde. Só ten algunhas aulas, para alumnado adulto, os martes pola mañá: «como dispomos dunhas salas de uso exclusivo no segundo andar, non temos problemas. A maioría dos espazos do edificio son compartidos entre os dous centros. Nós gañamos en metros, aínda que contamos cos mesmos espazos que na Almáciga. Unha gran vantaxe é que aquí en todas as salas de aula hai piano. Na Escola Municipal existe unha enorme satisfacción pola situación actual, polas moitas posibilidades que se nos ofrecen; hai unha sensación moi positiva, e a boa relación coa Escola de Altos Estudos Musicais favorece que sexa así».

Fernando Rey pensa que «existen moitas posibilidades de colaborarmos entre os dous centros. O noso profesorado xa se beneficiou nestes meses de formación con grandes solistas internacionais que veñen dar cursos de especialización ao centro de Altos Estudos Musicais. E temos a idea de que o seu alumnado poda relatar a súa experiencia e traxectoria ao noso, que expliquen o camiño para chegar a ser profesional da música».

Docente. Fernando Rey é de Vedra. Especialista en trompeta, dirixe a Escola Municipal de Música.

O centro. Funcionou desde comezos deste século na Almáciga. En setembro mudou a sede, para Vista Alegre, que agora comparte coa Escola de Altos Estudos Musicais.

Conoce nuestra newsletter con toda la actualidad de Santiago

Hemos creado para ti una selección de noticias de la ciudad y su área metropolitana para que las recibas en tu correo electrónico. Descubre nuestro nuevo servicio.

Votación
3 votos
Comentarios

Fernando Rey: «Formamos alumnado entre 3 e máis de 80 anos que non vén por un título»