Olalla Cociña gaña o premio de Poesía Afundación con «Vestir a noite»

Montse García Iglesias
Montse García SANTIAGO

SANTIAGO CIUDAD

PACO RODRÍGUEZ

O xurado destacou que o poemario achega «unha proposta dinámica e refrescante»

06 dic 2016 . Actualizado a las 13:15 h.

A escritora Olalla Cociña Lozano (Viveiro, 1979) é a gañadora da 14.ª edición do premio de Poesía Afundación, despois de que o xurado elixise por unanimidade o seu traballo Vestir a noite entre os 33 que cumprían as bases da convocatoria do certame.

O xurado, que se reuniu onte en Santiago, destacou que a obra de Olalla Cociña, presentada baixo o lema Tillandsia, é unha «proposta poética ben artellada e consciente da súa macroestrutura. Un traballo compacto con grandes virtudes expresivas e que ofrece unha visión harmónica dos espazos e dos tempos». Na acta, tamén incide na «imaxinería náutica e na habelencia na clausura dos textos». Por último, explica que Vestir a noite achega ao panorama da lírica galega «unha proposta dinámica e refrescante».

O premio, convocado por Afundación xunto co Centro Pen de Galicia e co patrocinio da Xunta, ten unha dotación económica de 6.000 euros e a obra será agora publicada na colección Arte de Trobar. O presidente do xurado, Luís González Tosar, do Centro Pen de Galicia, destacou o «alto nivel» das obras presentadas nesta nova edición do certame, asegurando que «están a altura de calquera das expresións poéticas que se fan en Europa».