«Garantimos a seguridade dos edificios, pero non haberá novas infraestruturas fóra de Medicina»
SANTIAGO CIUDAD
Viaño recorda que nos últimos anos creáronse quince universidades privadas en España, pero iso no quere dicir que foran a ser privatizadas as públicas. O que non é incompatible, ao seu parecer, co financiamento privado.
-Tendo en conta erros e malgastes do pasado, ¿que medidas se poden tomar para mellorar o financiamento do ensino universitario?
-A sociedade pode colaborar, o que pasa que aquí non hai cultura de mecenado como noutros países, pero deberíamos procurar que fose así. Todos colaboramos cos nosos impostos pero a investigación debería de ter achegas de todos os estamentos, tamén dos empresarios.
-¿Non hai doazóns?
-Hainas de material científico e bibliográfico pero económicas non. O que si hai é financiamento bancario, temos o compromiso do Banco Sabadell e de Abanca, sobre todo.
-¿E a Xunta?
-En xeral houbo entendemento coa Consellería de Educación. Un sempre preferiría máis, pero a negociación do plan de financiamento foi boa e a relación é fluída.
-¿Haberá novas infraestruturas grazas a esa mellora económica?
-Vaise facer unha forte inversión en Farmacia, que é a facultade que máis o precisa, e logo vanse facer obras de mantemento. De momento, non hai cartos para máis, garantimos a seguridade dos edificios, pero fóra de Medicina non haberá novas infraestruturas.
-¿Ese alivio económico terá reflexo na oferta educativa?
-Claro, vanse crear os graos de Criminoloxía e Biotecnoloxía e está en trámites a Escola de Doutoramento; hai másteres novos e seguiremos apostando polos graos dobres, que son os que obteñen mellores resultados.
-Medicina, Matemáticas o Física están a despuntar nos baremos internacionais. Estará especialmente orgulloso de Matemáticas...
-Por suposto, ademais os graos dobres de Matemáticas e Física son os que teñen as notas máis altas. Están moi ben posicionadas, temos dous Starting Grant en Física e a posibilidade de acadar máis, e Matemáticas é a mellor posicionada de España. Pero non se pode esquecer que tamén un recente estudo dicía que os graduados da USC en Humanidades son os máis valorados á hora de ser contratados.
-¿Está a USC a recuperar o prestixio que tiña?
-Figurar ou non nun ránking non é definitivo, pero recuperar esas tendencias indica que se están a facer as cousas mellor e se está a recuperar a posición que a USC sempre tivo e que se merece.