«Os concellos asignan poucos recursos a políticas de xénero»

A doctora en Ciencia Política sostén que o 35 % dos municipios detectou áreas da muller, centros de información no 37 %, e consellos de participación só nun 10 %


Natalia Paleo é nova doutora en Ciencia Política, tras defender con éxito na USC unha tese sobre As políticas municipais de xénero. Nivel de desenvolvemento e variables explicativas no caso galego, orientada polas profesoras Isabel Diz e Sara Berbel. Investigou durante máis de catro anos e centrou o seu traballo na lexislatura 2007-2011: «Analizo concretamente tres aspectos: a institucionalización, para ver se hai organismos específicos para levar a cabo esas políticas nos Concellos; os obxectivos que perseguen esas políticas, e os ámbitos de actuación», afirma.

-¿Como é a situación dos concellos galegos no desenvolvemento de políticas de xénero?

-O 76 % dos municipios galegos responderon que levaban a cabo políticas de xénero no ano 2010. O estudo detectou tres tipos de organismos específicos para promover estas políticas: as concellarías, os centros de información de mulleres, e os consellos de participación.

-¿Que ten maior presenza?

-Hai diferentes niveis de implantación: un 35 % dos municipios dispuñan dunha concellaría ou área da muller; os centros de información estaban nun 37 %; e os consellos de participación tiñan unha implantación moi baixa, só no 10 % dos municipios, e todos os que os tiñan eran concellos de máis de 5.000 habitantes, e das provincias da Coruña e Pontevedra.

-¿Inflúe o tamaño dos concellos no desenvolvemento destas políticas?

-Si que inflúe, canto máis grandes son os municipios máis posibilidades hai de que as políticas de xénero teñan un maior desenvolvemento. E tamén comprobei que nas provincias da Coruña e Pontevedra hai máis concellos que fan por conseguir obxectivos nesta área de actividade.

-¿Dedican os concellos moitos recursos para estas políticas?

-Un dos problemas fundamentais e unha das maiores queixas é que os concellos asignan poucos recursos a políticas de xénero. Moitos dispoñen dun orzamento moi pequeno, e o persoal ten dedicación en condicións moi precarias: sempre son mulleres, con contratos parciais, temporais. Este é un dos obstáculos fundamentais que se revela non só en Galicia, tamén en España; e iso representa un hándicap para poder consolidar estas políticas.

-¿Que outros factores destaca neste estudo?

-Unha conclusión é a influencia da cor do partido político, pois os situados máis á esquerda normalmente promoven máis estas políticas de igualdade de xénero. Outro factor que analizo é a presenza de mulleres en cargos electos, e conclúo que cantas máis mulleres sexan electas nos cargos de representación dos concellos, máis se favorece que as políticas de xénero se desenvolvan.

NATALIA PALEO DOUTORA EN CIENCIA POLÍTICA

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
2 votos

«Os concellos asignan poucos recursos a políticas de xénero»