Unha nova ruta difunde o Castro Lupario e o seu entorno en Rois

Acaba de sinalizala o Concello para dar a coñecer unha zona de valor histórico


Rois / La Voz

O Concello de Rois, xunto co de Brión, ven de sinalizar unha ruta no Castro Lupario e o seu entorno, que ten un percorrido base de 3,6 km e distintas variantes coas que se pode alongar ata os 4,5 km. O seu carácter circular permite comezala en diferentes puntos, aínda que no vídeo elaborado polo Concello para dala a coñecer se aconsella iniciala no Xardín do Recordo do pazo do Faramello, por ser un lugar no que é doado estacionar.

Os lugares de interese que atravesa este itinerario son a Ponte Paradela, o Castro Lupario, a aldea e área recreativa de Angueira de Castro, o río Tinto e o Pazo do Faramello, entre outros. Para a elaboración do vídeo promocional, a cargo da empresa compostelá Alicentis, o Concello contou con testemuñas de veciños coma Marcos Santos, para quen «camiñar por aquí e dar un paseo pola historia de Galicia».

A ruta ten dificultade baixa e pódese andar por distintos camiños, nalgún caso para pisar territorio de Brión, e todos eles sinalizados nas bifurcacións. Combina tramos de monte ata chegar ao Castro Lupario, co paso pola aldea de Angueira de Castro, quizais a máis fermosa do municipio de Rois, e polas beiras do río Tinto, así como permite coñecer o pazo do Faramello, un dos recursos turísticos máis destacados de Rois.

O alcalde, Ramón Tojo, agarda que esta ruta, xunto coa das Penicias, «sirvan para dar a coñecer, non só entre a veciñanza, senón en toda Galicia, os valores patrimoniais e naturais que atesoura Rois». A sinalización do sendeiro coincide, ademais, coa solicitude que acaba de facer o Concello a Xunta da declaración como Ben de Interese Cultural (BIC) para o conxunto formado polo Castro Lupario e a aldea de Angueira de Castro.

Un dos puntos de partida da ruta sinalizada está no Xardín do Recordo do pazo do Faramello

Conoce nuestra newsletter con toda la actualidad de Santiago

Hemos creado para ti una selección de noticias de la ciudad y su área metropolitana para que las recibas en tu correo electrónico. Descubre nuestro nuevo servicio.

Votación
1 votos
Comentarios

Unha nova ruta difunde o Castro Lupario e o seu entorno en Rois