Pere Tobaruela: «A novela reflexiona sobre o que nos rodea»

O escritor afincado en Rois sitúa a África como pano de fondo do seu libro «En branco e negro»


O escritor afincando en Rois Pere Tobaruela (Barcelona, 1965) presentou onte en Santiago a súa nova novela, En branco e negro, na que a protagonista é Sara Martí, unha xornalista que se nega a aceptar a realidade tal como é.

-Na novela introduce algúns dos conflitos dos últimos anos, como o exterminio nazi, a guerra dos Balcáns ou as represalias do réxime ditatorial en Guinea Ecuatorial.

-A protagonista, unha xornalista, a partir das súas propias vivencias e dos artigos que lle fan escribir, intenta reflectir todo o que a rodea. Chega un momento que ela di: «Todo o que escribo é sobre a dor do mundo». O que pretendo é facer unha reflexión sobre todo o que nos rodea, tanto a nivel xeral como particular. Así, están tamén as agresións ás mulleres Ademais, teño un gran interese nesta novela en África. Para min, África é o pano de fondo porque se aborda o proceso de independencia de Guinea Ecuatorial.

-Pero non todo é dor, tamén deixa espazo á esperanza.

-Si, sempre hai un lugar para esperanza. A protagonista fai o percorrido. Vive unha historia de amor tormentosa da que sae para adiante. Sempre pensa que hai esperanza, é o seu motor de vida. É unha novela para reflexionar sobre o que está pasando e, a partir de aí, intentar mudalo porque hai esperanza de mudalo.

-Vostede fixo colaboracións en revistas e xornais. ¿Por qué elixiu unha xornalista como protagonista?

-O escritor non escribe nada máis ca do que sabe. Entón, durante un tempo practiquei moito o xornalismo. Todas as historias que saen é porque entrevistei ou coñecín a xente que mas transmitiron. Entón, eu son Sara e Sara son eu. Nun momento dado tamén fago unha análise de cara a onde vai o xornalismo.

-¿Esa falta de aceptación do que sucede por parte da protagonista ten algo que ver coa posverdade?

-Non necesariamente. Vincúloo máis coa miña propia implicación de intentar cambiar as cousas que non me gustan. Creo que os escritores estamos obrigados a facer reflexionar sobre cousas que non gustan para ver se entre todos somos capaces de cambialas.

-É un cambio respecto a súa última novela, «Catro pedras vellas», dedicada ao público infantil. Vai mesturando.

-Transito entre a novela infantil e a novela para adultos. Necesito ir cambiando e agradezo o apoio de Baía Edicións.

-¿Ten xa algún novo libro entre mans?

-Si, teño xa varias obras. As inminentes son dúas infantís. Unha será da saga Formigas e estará ambientada en Santiago.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
3 votos
Comentarios

Pere Tobaruela: «A novela reflexiona sobre o que nos rodea»