Foi elixido por unanimidade polo pleno da entidade cultural de Padrón
18 dic 2020 . Actualizado a las 19:29 h.Anxo Angueira renova como presidente da Fundación Rosalía de Castro de Padrón durante catro anos máis. O profesor da Universidade de Vigo foi elixido por unanimidade nun pleno celebrado a última hora da tarde de onte e no que era o único candidato.
Xunto con el, forman parte da candidatura que resultou gañadora Ana Blanco como vicepresidenta; Xosé Carlos Beiró como secretario; Xosé García Lapido como tesoureiro; e como vocais Xosé Luís Axeitos, María López Sández e Chus Pato.
Ademais, a fundación deulle a benvida a tres novos membros: Ana Acuña, María López Sández e Xosé García Lapido; e agradeceulle o traballo a Justo Cortizo, o tesoureiro da entidade durante tantos anos, que deixa o posto pero continúa no pleno da fundación.
Anxo Angueira foi elixido presidente desta entidade en 2012. Desde entón as visitas á Casa-Museo incrementáronse nun 260%, segundo informa a propia fundación, pasando de 8.655 en 2012 a 22.463 en 2019. Ao mesmo tempo, a entidade pasou dunha taxa de autofinanciamento do 20% en 2012 a un 45% en 2019, grazas á subscrición popular que ten en marcha.
Dende 2012, a Casa de Rosalía incrementou tamén exponencialmente os proxectos e actividades. Aparte da reforma do interior do inmoble de A Matanza, en Padrón, e da súa renovada musealización, catalogou e dixitalizou todo o fondo documental e acondicionou unha sala para o arquivo, que xa está a disposición dos investigadores; dinamizou a súa presenza na web e nas redes sociais; incrementou o seu patrimonio coa chegada de novos obxectos, artísticos ou non, como o cadro de Brocos e diferentes pezas de Ovidio Murguía; publicou a súa Obra completa, entre outros libros; relanzou a celebración do Día de Rosalía e puxo en marcha ducias de actividades ao longo do ano: a homenaxe ao mundo do mar, o festival Abride a Fiestra, sen contar múltiples exposicións, conferencias, roteiros, teatralizacións e visitas guiadas, tal e como destacan desde a propia fundación.