Pechará abril con tres días de festas con Davide Salvado como cabeza de cartel
13 abr 2017 . Actualizado a las 10:10 h.28, 29 e 30 de abril?•?Casco vello melidense?• O grupo Zoelas abrirá o último venres deste mes
A Foliada, unha cita que reivindica a cultura musical galega e que consolidou Melide como referente para agrupacións folclóricas de toda a comunidade, volve este mes. De todos os recunchos de Galicia se desprazarán agrupacións a última fin de semana de abril para participar na vila melidá dun encontro que reunirá a vinte formacións nun concurso de taberna e a trece grupos máis na marcha gaiteira do serán. Un sólido cartel musical que nesta edición encabeza Davide Salvado.
Melide despedirá abril por todo o alto, porque de altura é a programación que os vindeiros días 28, 29 e 30 reunirá na vila a agrupacións de música popular de toda a comunidade. Para o folclore galego consolidou a vila melidá como referente a Foliada, que, trece anos despois de que nacese como un encontro de amigos en torno á música e ao baile galegos, propón ao público tres xornadas de festa, ás que darán a benvida Zoelas.
Esta incipiente formación de esencia feminina que soa cada vez con máis forza dentro do panorama musical galego é un dos grupos que integran o cartel da Foliada. Encabézao Davide Salvado, un artista autodidacta que botou a andar da man de Ugia Pedreira e Xosé Manuel Budiño e que labrou o seu perfil profesional cos ritmos e as coplas que foi recompilando polas aldeas galegas. Coma unha homenaxe ao aprendido de pandeireteiras e bailadoras foi concibido "Lobos", o disco en solitario que repasará o último domingo deste mes en Melide nunha actuación coa que dará paso no escenario a Blues do País. Este dúo, que converte clásicos do blues e do soul internacionais en cancións con referencias galegas, desembarcará acompañado pola banda de músicos O Sindicato da Verbena. Serán quen digan adeus a un cartel musical que na xornada do sábado ofrecerá os concertos dos percusionistas de Pelepau e do grupo Maskarpone.
Ska e reggae mesturados con rock e música tradicional son a proposta para despedir o día grande da Foliada, que, como tal, será o que arroupe tres dos máis grandes encontros de agrupacións de música popular do país. Repartiranse nun concurso de cantos de taberna no que vinte formacións animarán o ambiente nos bares do casco vello de Melide, nunha marcha gaiteira coa participación de quince formacións e nun serán no que trece formacións da comarca revivirán o que foi o xermolo da Foliada.
Como toda boa festa que se prece non se botará en falta a animación de rúa, que correrá a cargo dos tradicionais xigantes e cabezudos, e dos Treboeiros de Muimenta. E como espazo para reivindicar o folclore popular galego, non faltará o baile tradicional. Impartirá un taller Rebeca Tallón coa colaboración do grupo Bico da Balouta e ofrecerá unha exhibición a Asociación Cultural Donaire, da Coruña. Herba Grileira, de Melide, e Fiadeira, de Antas de Ulla, son as formacións ás que se lles encomendou o aporte musical matutino do domingo, que contará cunha sesión vermú a cargo de Andarivel.
Xogos populares como espazo de encontro entre xeracións, a actuación de Paco Nogueiras para o público infantil e o concerto íntimo do gaiteiro Óscar Ibáñez, que tamén presentará senllos traballos musicais sobre os tamén gaiteiros Xoán Tilve e Ricardo Portela, completan unha programación envolta nunha mostra de artesanía na que se exporán dende instrumentos tradicionais e traxes rexionais a tallas de madeira e de pedra. Estará emprazada na praza do Convento, o corazón do casco vello de Melide, o epicentro dunha Foliada que se presentou «logo de meses de moito esforzo», afirmou Miguel Varela, da asociación cultural e musical O Castelo, o colectivo que organiza o encontro. El e a súa compañeira Laura Ferreiro debullaron unha programación coa que a cita se afianza como «un referente no calendario musical e cultural de Galicia». Acompañounos a alcaldesa melidá, Dalia García Couso, que gabou o traballo da organización da Foliada e xustificou o apoio municipal co que conta na constancia de que «ten unha repercusión turística importante e fai gala do que son o noso baile e música tradicionais».