As obras permanecerán expostas na Facultade de Xeografía e Historia e formarán parte das visitas guiadas á institución
08 sep 2026 . Actualizado a las 04:55 h.A Universidade de Santiago recibiu en comodato trece obras do pintor Fenollera e Ibáñez, que estarán situadas nas aulas 12, 13 e 15 da Facultade de Xeografía e Historia, así como no despacho do decano. «A historia deste edificio, e particularmente do seu Paraninfo, ten todo que ver con José María Fenollera», apuntou a vicerreitora de Cultura, Ana Cabana, durante o acto de entrega. Ademais, repasou a traxectoria deste artista nacido en Valencia en 1851 e que chegou a Santiago en 1886, cidade que se converteu «na súa residencia permanente e na que deixou unha profunda pegada tanto a través do seu maxisterio na Real Sociedade Económica de Amigos do País como da súa obra, fundamental no patrimonio da Universidade de Santiago, co magnífico conxunto mural do Paraninfo».
O artista era «un extraordinario retratista e pintor de tipos e escenas de costumes», como queda patente nas trece obras que onte recibiu a Facultade de Xeografía e Historia. Entre estas, atópanse un retrato de Ramón Sanjurjo Pardiñas, alcalde de Santiago en dous mandatos a finais do século XIX e principios do XX, unha fiandeira e un «anxo caído». Estas obras cedidas temporalmente incorporaranse ás visitas guiadas da USC. No acto de entrega estiveron presentes Nica Fernández-Cid Fenollera, Juan Fenollera Durán e María del Carmen Vilasenín Vila, sobriños netos do artista.