Teatro, rutas históricas, música e unha mostra para celebrar o Orgullo fronte á LGTBIfobia
SANTIAGO
O Concello de Santiago pon en marcha a campaña «Contra o odio: rede, cultura e orgullo»
13 jun 2026 . Actualizado a las 05:00 h.«Contra o odio: rede, cultura e orgullo». Ese será o lema co que o Concello de Santiago celebrará este ano o Día do Orgullo e as actividades que promove durante a segunda quincena de xuño para lle dar visibilidade á diversidade e facer fronte ao incremento da LGTBIfobia, sobre a que onte advertiu a alcaldesa, Goretti Sanmartín, na presentación desa programación. A rexedora falou de tempos de involución e de mensaxes «terribles de odio e acoso contra o colectivo LGBTIQ+», actitudes que deberían estar «totalmente desterradas no século XXI» e ante as que invitou a celebrar a diversidade e a reclamar os dereitos de maneira festiva.
A campaña, que circula xa en autobuses da cidade e que chegará ás redes sociais e a locais de hostalaría e comercio, basea a súa mensaxe neses tres piares, rede, cultura e orgullo, tomando a rede como a forma de fortalecer os espazos de apoio mutuo e a colaboración entre institucións e o tecido asociativo; a cultura como ferramenta de sensibilización; e o orgullo como a maneira de reivindicar as identidades diversas.
O programa, que a alcaldesa presentou coa directora do Centro de Información á Muller (CIM), Rita Barreiro, arrancará o día 15 coa representación da obra teatral «Travesía Unicornio», de Teatro Ghazafelhos, no parque de Bonaval. Vai dirixida ao público familiar para fomentar valores de respecto e diversidade. O 19 haberá o roteiro «Vida e historias LGBT da Compostela medieval e moderna», que guiará Carlos Callón para visibilizar a memoria histórica e realidades LGBT máis aló da idade contemporánea. Para participar é precisa inscrición previa a través do formulario ao que se pode acceder co código QR do folleto informativo da programación.
Do 22 ao 28, no centro sociocultural do Ensanche, ofrecerase a instalación artística comunitaria «Rostros e corpos contra o odio», onde os cidadáns poderán participar compartindo mensaxes e reflexións, mentres que o xoves 25 haberá o faladoiro «Contra o odio: orgullo» na Casa Xohana Torres. Será un espazo de análise e diálogo con Xandre Garrido López sobre a situación actual da LGTBIfobia e o impacto dos discursos de odio.
O programa concluirá o 27, coa Gala do Orgullo, o evento central da campaña e que contará con actuacións musicais (O Xoán, Pídechas o corpo), drag (Amanda Carallo) e a entrega de premios do certame de poesía de Avante LGBT+. Será en Mazarelos. O día antes, o 26, diante do Concello, darase lectura ao manifesto que a corporación municipal aprobou no pleno de maio polo Día do Orgullo.