«Na peza queremos amosar a pegada emocional que deixou María Casares»

Montse garcía SANTIAGO / LA VOZ

SANTIAGO

Marcos Míguez

O espectáculo «Continente María» pódese ver ata o 29 no Salón Teatro

21 may 2022 . Actualizado a las 04:55 h.

Teses, biografías, charlas, exposicións... As iniciativas para conmemorar o centenario do nacemento da actriz María Casares sucédense durante os últimos meses. Pero tamén era preciso amosala desde a escena, ese ámbito no que se converteu en referente chegando a ser a grande actriz da súa época en Francia, onde se exiliou. E a esa intención responde Continente María, o espectáculo que se pode ver no Salón Teatro compostelán ata o día 29 —funcións de xoves a sábado ás 20.00 horas e os domingos, ás 18.00 horas—. Trátase dunha coprodución entre o Centro Dramático Galego (CDG), Ainé Producións, A Quinta Cuadrante e o Concello da Coruña.

«O que nós quixemos non foi tanto contar a vida de María Casares, que xa está no inconsciente colectivo, senón tratar de reflectir no escenario a pegada emocional e de aprendizaxe vital que deixou en nós; o que a súa figura nos aportaba a nós como habitantes deste teatro do século XXI», explica Tito Asorey, director da peza, que conta sobre as táboas coa actriz Melania Cruz e co músico Vadim Yukhnevich. Precisamente, a intérprete recalca que nos 70 minutos de espectáculo ofrecen un percorrido «non tanto arredor da súa figura como actriz, senón como persoa que foi fiel a si mesma, porque sempre se mantivo fiel ao que ela sentía e quería, así foi como desenvolveu sempre a súa vida tanto persoal como profesional».

Nesta proposta na que conflúen teatro, poesía e música, Melania Cruz establece un diálogo con María Casares, de xeito que en ocasións fala como Melania e, noutras, como a actriz coruñesa. «O maior reto foi asumir que María é un continente, un océano inabarcable», detalla. Que supón poñerlle voz a unha gran referente da escena? «Eu entregueime en corpo e alma ao que ela me podía dar. Entón, dixen: ‘aí está o meu corpo e a miña voz como canle para que María fale a través de min'. Non é que eu encarne a María Casares, senón que se establece un diálogo entre as dúas», responde. No mesmo sentido se expresa Tito Asorey: «Non se trata de interpretar a María Casares, senón de ser un canal para que a súa figura e a súa voz aparezan en escena». O director incide no traballo feito pola actriz e o músico ante o reto «de asumir a responsabilidade que ten tamén traer a María Casares de volta ao teatro».

Continente María vai máis alá da figura da actriz. «É un espectáculo que fala moito de María Casares, pero tamén fala moito de nós», afirma Tito Asorey. Melania Cruz engade máis argumentos xa que o espectáculo «tamén é unha reflexión en torno á memoria, ao que se nos contou. Tamén hai unha historia aí que temos que descubrir para ter unha visión total e completa do que foi o noso país durante o século XX e neste».

Este achegamento á figura de María Casares desde o teatro contemporáneo está pensado «para chegar a todos os públicos, que non sexa algo unicamente para a xente do teatro», destaca Tito Asorey. «O que teño claro é que se che interesa a figura de María Casares, vas a gozar; e se non coñeces nada dela, vala gozar e descubrir a unha figura excepcional da cultura galega. Parecíanos importante que servira para difundir», engadiu o director. Nese aspecto, Melania Cruz apuntou que lle gustaría que «cada quen leve a súa imaxe ou conxunto de imaxes sobre María e, principalmente, que quede con ganas de ler máis sobre ela e de achegarse a súa figura. Estaría ben que a xente quixese seguir descubrindo máis sobre ela porque, por desgraza, é una gran descoñecida xa que forma parte dese borrado cultural e de mulleres que foi consecuencia da Guerra Civil e da ditadura».

O día da presentación da montaxe, o director xeral de Cultura, Anxo Lorenzo, resaltou que asistir ás funcións da montaxe de Continente María supón «unha oportunidade para ver desde a creación contemporánea a unha figura fundamental». Lembrou, ademais, que a actriz nunca volveu a Galicia desde que se exiliou en Francia, «e esta proposta é un xeito de ter a María Casares aquí».

Xosé A. Touriñán, Tito Asorey, Melania Cruz, Anxo Lorenzo e Fran Núñez, na presentación do espectáculo en Santiago XOAN A. SOLER

O proxecto teatral para abordar a figura da actriz naceu no 2007

Foi no ano 2007 cando a idea de dedicarlle unha peza a María Casares empezou a agromar na cabeza de Tito Asorey e Melania Cruz. Ademais, unha especialista na actriz, María Lopo, animounos. Sen embargo, non chegou a facerse realidade ata agora. «Nós estabamos seguros de que en algún momento da nosa vida iamos facer algo sobre María Casares», afirma Melania Cruz. Para iso foi clave a implicación de Ainé Producións, encabezada por Xosé A. Touriñán, o CDG e o Concello da Coruña, aos que os impulsores agradecen o apoio. A peza conta con texto de Marianella Morena e do equipo tamén forman parte Laura Iturralde, José Faro Coti e Jairo Iglesias.

O director do CDG, Fran Núñez, salientou o traballo «moi ben feito» nesta produción. Pola súa parte, Xosé A. Touriñán expresou o desexo de que a peza viaxe moito por Galicia e poida chegar tamén aos sitios onde María Casares foi feliz.

Constitúe a quinta coprodución estreada durante este ano polo CDG

Continente María é a quinta coprodución estreada polo CDG, a unidade teatral da Xunta, no que vai de ano. Súmase así a Come and go, de Helena Salgueiro; O péndulo, de Inversa Teatro; Rastros, de Condetrespés; e os novos volumes de Clásicas desfeitas, xunto á Cidade da Cultura e as compañías Galeatro e Moving Compass. Aínda está pendente de estrea neste primeiro semestre Asemblea xeral, de Sarabela Teatro, que se escenificará o 28 de maio no Barco de Valdeorras.

Por outra parte, a Agadic acaba de activar a selección do elenco artístico que formará parte das tres producións propias do CDG para o vindeiro curso.