Actos literarios e reivindicativos para celebrar a Festa da Palabra en Santiago
SANTIAGO
Compostela e outros concellos da zona conmemoraron o Día das Letras Galegas
18 may 2022 . Actualizado a las 05:00 h.Compostela e os concellos da súa área metropolitana celebraron a festa das Letras con numerosos actos que reivindicaron o galego e lembraron a Florencio Delgado Gurriarán. Ademais da multitudinaria manifestación convocada por Queremos Galego, que pese á choiva mobilizou a milleiros de persoas polas rúas de Santiago, houbo actos literarios en varias localidades.
O Casino de Santiago celebrou o Día das Letras con Suso de Toro e Inma López Silva que asinaron os seus libros, «Un señor elegante» e «O libro da filla», finalistas do Premio de Novela Europea Casino de Santiago na modalidade de Novela Traducida. Tamén houbo regalo de libros, coa iniciativa «un café, un libro». Ademais, coa colaboración da asociación Comercio Punto Compostela, da Consellería de Cultura e do Concello de Santiago, o Casino repartiu nos comercios e nas librarías paraugas ilustrados coa imaxe de Arantxa Portabales e do seu libro «Deixe a súa mensaxe despois do sinal».
Na Praza de Praterías realizouse unha lectura pública de poemas do libro de Delgado Gurriarán «Galicia infinda», recitados na Casa do Cabido por cinco alumnas do Instituto Xelmírez I, membros do grupo de teatro deste centro compostelán, Vai no Dentista.
En Brión, a escritora e actriz Paula Carballeira recolleu o IV Premios Laudamuco para textos teatrais en galego, entregado pola concelleira de Cultura, Sandy Cebral. Paula Carballeira concorreu ao certame coa obra «Dentes de coello».
Pola súa banda, en A Baña, o mestre e músico Alonso Barreiro Caxade recibiu na Casa da Cultura desta localidade o I Premio Daniel García Barros, instituído polo Concello para recoñecer, con motivo do Día das Letras, o traballo en favor da lingua e a cultura galegas. O alcalde bañés, Andrés García Cardeso, destacou o «encomiable traballo» realizado por Alonso Barreiro durante os sete anos nos que estivo á fronte da escola unitaria de Lañas.
«Caladas non estamos máis guapas» é o título do traballo gañador do Premio de relato curto en prol da igualdade convocado polo Concello de Melide. Ariadna Penín Miguélez, veciña do municipio, é a súa autora. O certame tamén distinguiu cun segundo e terceiro premios os relatos, respectivamente, da tamén melidense Alba Rial González, e Alba Sánchez Ares, de Santiago.