—É farragoso reclamar?
—Para nada é complicado presentar unha reclamación ante o IGCC. Mesmo se pode facer dende a páxina web. Pero a primeira reclamación tras consultarnos a nós é ante a empresa, que no prazo dun mes ten que dar unha resposta axeitada e motivada ao consumidor. Do contrario, pode ter unha sanción. Nesa reclamación á empresa, sobre todo cando sabe que se traballa xa con Consumo na cuestión, as compañías buscan unha solución porque prefiren non ter problemas cos seus clientes. As empresas teñen certo respecto a que lles poñan unha reclamación en Consumo.
—Aumentaron as reclamacións por transaccións por Internet?
—Hai moitísimas máis, si, de distintos sectores, porque hoxe se contrata na rede dende a telefonía á electricidade, viaxes e ocio ou téxtil. Preocúpanos Internet, está nos nosos plans de inspección e cada ano facemos controis do correcto funcionamento de páxinas webs. En concreto, no 2021 centrámonos moito no referido á compra de material relacionado coa pandemia, de máscaras a xel hidroalcohólico e test, porque moita xente mercouno a través de Internet e non sempre tiñan as condicións de garantía de produto, como marcado CE e demais elementos de seguridade e adecuación do produto. Tamén estamos aí facendo un labor de estudo, e no seu caso, sancionador.
